Noma’lum shaxslar BITPoint kriptobirjasidan 32 million dollardan ortiq kriptovalyutani o’g’irlab ketishdi.
O‘g‘irlangan mablag‘larning katta qismi birja mijozlariga tegishli bo‘lgan.
Yaponiya kriptovalyuta birjasi BITPoint Japan xakerlar hujumi qurboni bo‘ldi, natijada 3,5 milliard iyen (32,2 million dollar) qiymatidagi turli raqamli valyutalar o‘g‘irlandi. Voqeadan so‘ng platformadagi barcha operatsiyalar to‘xtatildi. BITPoint operatori Remixpoint bayonotiga ko’ra, 11 iyul kuni ertalab birja xodimlari Bitcoin, Ethereum, Bitcoin Cash, Litecoin va XRPning shubhali harakatlarini payqashgan. To’rt soatdan keyin o’g’irlik tasdiqlandi va barcha operatsiyalar to’xtatildi.
Hujumchilar platformaning issiq hamyonidan 32 million dollar olib chiqishga muvaffaq bo’lishdi, ularning aksariyati BITPoint mijozlariga tegishli edi. Hozirda kompaniya voqea yuzasidan surishtiruv olib bormoqda. BITPoint vakillarining aytishicha, birja qurbonlarga tovon to’laydi.
Joriy yilning may oyi boshida dunyodagi eng yirik kriptovalyuta birjalaridan biri bo‘lgan Binance “katta xakerlik” haqida xabar berdi. Hujumchilar xizmatning bir nechta akkauntlari uchun foydalanilgan “issiq” hamyonidan 7000 dan ortiq bitkoinlarni (taxminan 41 million dollar) o‘g‘irlashgan, shuningdek, treyderlarning shaxsiy ma’lumotlarini, jumladan, shaxsiy kalitlarni, ikki faktorli autentifikatsiya parollarini va boshqa ma’lumotlarni qo‘lga kiritishgan.
