Aholi zich joylashgan hududlar ustida aylanib yuruvchi dronlar xavfsizlikka tahdid solmoqda
Dronlarni aniqlash va o’chirish yechimlari bozori 2024-yilga kelib 1,85 milliard dollargacha o’sadi.
Zamonaviy dunyoda uchuvchisiz uchish apparatlari harbiy operatsiyalar va razvedkadan tortib, dori-darmon va hatto pitsa yetkazib berishgacha bo’lgan turli vaziyatlarda qo’llaniladi. Biroq, tadqiqotchilar aholi punktlari ustidan uchib o’tadigan dronlar shaxsiy xavfsizlikka tahdid solishi haqida ogohlantirmoqda. Chorshanba, 27-mart kuni Isroilning Negev Ben-Gurion universiteti va Yaponiyaning Fujitsu System Integration Laboratories kompaniyasi mutaxassislari hozirda dronlarni aniqlash va o’chirish uchun qo’llaniladigan 200 dan ortiq texnika va texnologiyalarni o’rganuvchi tadqiqot natijalarini e’lon qilishdi. Ularning maqsadi qonun chiqaruvchilar va ishlab chiqaruvchilar dronlardan foydalanishni qanday tartibga solishga urinayotganini tushunish edi. Tadqiqotchilar ta’kidlashicha, bu tadqiqot o’z turidagi birinchi tadqiqotdir.
Tadqiqot shuni ko’rsatdiki, zamonaviy dronlarda qo’llaniladigan kiberxavfsizlik choralari qoniqarli emas. Dronlar bilan bog’liq hodisalar har kuni qayd etiladi, eng shov-shuvli hodisa Buyuk Britaniyaning Gatvik aeroportida bo’lgan.
Tahdidning ortib borayotgani sababli, rasmiylar dronlarni samarali aniqlash va o’chirish usullarini izlamoqda. Ushbu bozor 2024-yilga kelib 1,85 milliard dollarga yetishi kutilmoqda. Ushbu «chaqirilmagan mehmonlar»ni aniqlash uchun tashkilotlar radar, radiochastota skanerlari, termal tasvir kameralari va hatto maxsus o’qitilgan ov lochinlari kabi turli usullardan foydalanmoqdalar. Eng so’nggi texnologiyalar qatoriga dronlarni kuzatish dasturi kiradi.
Tadqiqotchilarning fikriga ko’ra, quyidagi videoda ko’rsatilganidek, bunday dasturiy ta’minotni buzib kirish oson.
Mutaxassislar, shuningdek, internetdan jismonan ajratilgan aqlli uylar yoki korporativ tizimlarni buzib kirish uchun maxsus uskunalar va radio tizimlarini yetkazib berish uchun dron ishlatilgan g’ayrioddiy hujumni namoyish etdilar. Hujum begunoh pitsa yetkazib berish niqobi ostida bo’lgan.
