Amerika texnologiya kompaniyalari Huawei yetkazib berishga qo‘yilgan taqiqni chetlab o‘tish yo‘lini topdi.
Kompaniyalar xorijda ishlab chiqarilgan mahsulotlar har doim ham «AQShda ishlab chiqarilgan» deb hisoblanmasligidan foydalanmoqda.
Ba’zi amerikalik protsessor ishlab chiqaruvchilari Tramp ma’muriyati tomonidan kiritilgan taqiqlarga qaramay, Xitoyning Huawei telekommunikatsiya kompaniyasi bilan ishlashda davom etmoqda. Bu haqda xabardor manbalarga tayanib, The New York Times xabar berdi. Gazeta manbalariga ko’ra, bu kompaniyalar orasida so’nggi uch hafta davomida AQShdan tashqarida ishlab chiqarilgan mahsulotlarini yetkazib berishda davom etgan Intel va Micron Technology ham bor. Bu kompaniyalar chet elda ishlab chiqarilgan mahsulotlar har doim ham «AQShda ishlab chiqarilgan» deb hisoblanmasligidan foydalanmoqda, deya tushuntirdi manbalardan biri. Taqiqni chetlab o‘tish orqali Amerika kompaniyalari Huawei’ga smartfon va serverlar kabi uskunalarni yig‘ish va sotishda davom etishiga yordam beradi, deya qayd etadi NYT.
Amerika kompaniyalariga joriy yilning avgust oyi oʻrtalariga qadar bozorda mavjud boʻlgan Huawei qurilmalari uchun butlovchi qismlarni sotishga ruxsat berilgan, biroq Xitoy kompaniyasidan yangi mahsulotlar uchun butlovchi qismlarni yetkazib berishni taqiqlash allaqachon amalda. Gazeta manbalari Huawei mahsulotlarining necha foizi kelajakdagi ishlanmalar uchun komponentlar ekanligiga aniqlik kiritmagan, biroq baʼzi hisob-kitoblarga koʻra, Amerika ishlab chiqaruvchilari va Xitoy kompaniyasi oʻrtasidagi bitimlar hajmi millionlab dollarlarni tashkil qiladi.
AQSh Savdo vazirligining sobiq xodimi Kevin Vulfning tushuntirishicha, agar mahsulotlar AQShdan tashqarida ishlab chiqarilgan bo’lsa va ularning sotilishi mamlakat milliy xavfsizligiga tahdid solmasa, taqiqni chetlab o’tish mumkin.
Eslatib o‘tamiz, may oyida Donald Tramp amerikalik kompaniyalarga AQSh milliy xavfsizligiga xavf tug‘diruvchi xorijiy ishlab chiqaruvchilardan uskunalar sotib olishni taqiqlovchi milliy favqulodda holat e’lon qilish haqidagi farmonni imzolagan edi. Natijada, Amerikaning bir qancha yirik korporatsiyalari Huawei bilan hamkorlikni toʻxtatishga majbur boʻldi, chunki ikkinchisi oʻzaro aloqalari cheklanishi yoki butunlay yoʻq qilinishi kerak boʻlgan kompaniyalarning “qora roʻyxati”ga qoʻshildi.
