AQSh rasmiylari Huawei’ni maxfiy ravishda kuzatib borishdi
Xorijiy razvedka kuzatuvi to’g’risidagi qonunga muvofiq to’plangan ma’lumotlar sudda Huawei kompaniyasiga qarshi ishlatiladi.
AQSh rasmiylari maxfiy ravishda to’plangan ma’lumotlar asosida Xitoyning Huawei kompaniyasiga qarshi sanksiyalarni buzish va bank firibgarligi ayblovlarini qo’zg’atmoqchi. Bruklin federal sudida bo’lib o’tgan sud majlisida AQSh prokurori yordamchisi Aleks Solomon Tashqi razvedka kuzatuvi to’g’risidagi qonun (FISA) bo’yicha to’plangan ma’lumotlar maxfiylikni talab qilishini aytdi.
Reuters agentligining xabar berishicha, 4-aprel, payshanba kuni AQSh hukumati sud qarori orqali Huawei rahbariyatini kompaniyaga qarshi elektron va jismoniy kuzatuv orqali to’plangan ma’lumotlardan foydalanish niyatida ekanligi haqida xabardor qilgan. AQSh rasmiylari qo’shimcha tafsilotlarni taqdim etmadi.
Vashington Xitoy josusligining potentsial tahdidi tufayli o’z ittifoqchilarini Huawei mahsulotlarini o’z uyali tarmoqlarida ishlatishni to’xtatishga faol ravishda undamoqda. Kompaniya, o’z navbatida, barcha ayblovlarni rad etmoqda.
Huawei kompaniyasining amaldagi ishiga aloqador bo’lmagan sobiq AQSh prokurori Brayan Freyning so’zlariga ko’ra, FISA maxsus sud qarori bilan kuzatuvga ruxsat beradi va odatda xorijiy hukumat josuslik ishlarida qo’llaniladi. Freyning qo’shimcha qilishicha, AQSh hukumati Huawei kompaniyasining josuslik salohiyatidan yillar davomida xavotirda.
O’tgan oy Reuters agentligi AQSh razvedka agentliklari aeroportlardagi rahbarlarning qurilmalaridan ma’lumotlarni nusxalash orqali kompaniya faoliyatini yashirincha kuzatib borayotgani haqida xabar bergan edi. Axborot agentligining xabar berishicha, kuzatuv Xitoy va AQSh o’rtasidagi iqtisodiy taranglik kuchayishidan ancha oldin boshlangan.
FISA – bu AQSh razvedka agentliklariga milliy xavfsizlik maqsadlarida norezidentlarning foydalanuvchi ma’lumotlariga kirishga ruxsat beruvchi AQSh federal qonuni. U faqat AQSh ichida amal qiladi.
