ARM Huawei bilan hamkorlik qilishni rad etgan kompaniyalar safiga qo’shildi.
Britaniya kompaniyasi AQSh hukumatining barcha so’nggi qoidalariga rioya qiladi.
RISC protsessor arxitekturasini ishlab chiqaruvchi dunyoning eng yirik kompaniyalaridan biri bo’lgan britaniyalik ARM korporatsiyasi Huawei bilan hamkorlik qilishni rad etgan kompaniyalar safiga qo’shildi. BBC ma’lumotiga ko’ra, ARM boshqaruvi xodimlarga Xitoy kompaniyasi bilan «barcha amaldagi shartnomalar, qo’llab-quvvatlash huquqlari va rejalashtirilgan kelishuvlarni» to’xtatishni buyuruvchi ichki ko’rsatma chiqardi. O’tgan hafta AQSh Savdo vazirligi Huawei’ni o’zining «qora ro’yxatiga» kiritdi, unga ko’ra amerikalik kompaniyalar hukumatning oldindan roziligisiz texnologiya yetkazib bera olmaydi. AQSh hokimiyatlari Huawei’ning AQSh milliy xavfsizligi va tashqi siyosat manfaatlariga zid faoliyatlarda ishtirok etganini tasdiqlovchi dalillarga ega ekanini ma’lum qildi. Shu bois kompaniya qora ro’yxatga kiritildi.
Huawei bilan turli darajada hamkorlik qilishni rad etgan kompaniyalar ro’yxatiga allaqachon Intel, Qualcomm, Xilinx, Broadcom va Google kiritilgan. Microsoftning Xitoy kompaniyasi bilan hamkorlikni cheklash bo’yicha rejasi ham ma’lum bo’ldi. Endi esa bu ro’yxatga Britaniyaning ARM kompaniyasi ham qo’shildi.
ARM bayonotiga ko’ra, ishlab chiqaruvchi «so’nggi AQSh hukumat qoidalariga rioya qilmoqda.» Biroq kompaniya qo’shimcha tafsilotlarni oshkor qilmadi. Huawei vakillari esa ARM qarorini «afsuslanarli» deb atashdi.
«Biz hamkorlarimiz bilan yaqin munosabatlarimizni qadrlaymiz, lekin ularning ba’zilari siyosiy motivli qarorlar tufayli kuchli bosim ostida ekanini tushunamiz. Biz bu afsusli vaziyatni hal qilish mumkinligiga ishonamiz va bizning ustuvorligimiz butun dunyo bo’ylab mijozlarimizga jahon darajasidagi texnologiya va mahsulotlarni taqdim etishda davom etadi», dedi Huawei.
