Buyuk Britaniya xavfsizlik muammolari tufayli 5G tarmoqlarini joriy etishni kechiktirishi mumkin.
Buyuk Britaniya Huawei’ning mamlakatdagi faoliyatiga oid qoidalarni to‘liq taqiq qo‘ymasdan kuchaytirmoqchi.
Buyuk Britaniya hukumati Xitoyning Huawei kompaniyasi uskunalaridan foydalanishga cheklovlar qo’yilsa, 5G tarmoqlarini joriy etishni to’xtatib qo’yishi mumkin, deydi Raqamli texnologiyalar, madaniyat, ommaviy axborot vositalari va sport departamenti rahbari Jeremi Rayt. «5G joriy etilishida kechikish ehtimoli mavjud […] Agar siz 5G ni tezroq joriy qilmoqchi bo’lsangiz, buni xavfsizlikka ahamiyat bermasdan qilyapsiz. Biz bunga tayyor emasmiz, shuning uchun men biroz kechikish ehtimolini istisno qilmayman», dedi Rayt parlament qo’mitasi yig’ilishida.
Bloomberg xabar berishicha, Buyuk Britaniya hukumati ishlab chiqaruvchining Xitoy razvedka idoralari bilan hamkorligi haqidagi xavotirlar tufayli boshqa mamlakatlarni Huawei texnologiyasidan foydalanishni to’xtatishga chaqiruvchi AQSh kampaniyasiga mumkin bo’lgan javobini baholamoqda. Yakuniy qaror telekommunikatsiya uskunalarini yetkazib berish zanjiri bo’yicha o’zining tekshiruvi natijalari asosida qabul qilinadi.
Agentlik ma’lumotlariga ko’ra, Buyuk Britaniya Huawei kompaniyasining mamlakatdagi faoliyatiga oid qoidalarni to’liq taqiq qo’ymasdan kuchaytirmoqchi. Raytning so’zlariga ko’ra, bu qarorning asosiy omili Buyuk Britaniyaning Xitoy kompaniyasining uskunalaridan foydalanish bilan bog’liq potentsial xavflarni kamaytira olishi bo’ladi. Agar bu imkonsiz bo’lib chiqsa, vazir mamlakat Avstraliyaning o’rnagiga ergashib, Huawei kompaniyasini 5G tarmog’ini joriy etishdan chetlashtirishi mumkinligini istisno qilmadi.
Eslatib o’tamiz, Buyuk Britaniya ilgari Huawei kompaniyasining dasturiy ta’minot ishlab chiqishga yondashuvini tanqid qilgan edi. Milliy kiberxavfsizlik markazining Kuzatuv kengashi hisobotida aytilganidek, kompaniya o’z qurilmalari va texnologiyalarini takomillashtirishda muvaffaqiyatsizlikka uchramoqda.
