Ekvador prezidenti: Assanj elchixonani «josuslik markazi»ga aylantirgan
Julian Assanj boshpana so’rash shartlarini muntazam ravishda buzgani uchun 12 oygacha qamoq jazosiga hukm qilinishi mumkin.
Julian Assanj boshpana shartlarini muntazam ravishda buzgan va Londondagi Ekvador elchixonasidan «josuslik markazi» sifatida foydalanishga uringan, deb ma’lum qildi Ekvador prezidenti Lenin Moreno The Guardian nashriga bergan intervyusida. Moreno Britaniya rasmiylaridan Assanjning huquqlari hurmat qilinishi va o’lim jazosiga hukm qilinish uchun ekstraditsiya qilinmasligi haqida yozma kafolatlar olganini aytdi.
Eslatib o’tamiz, 11-aprel, payshanba kuni 47 yoshli WikiLeaks asoschisi Britaniya politsiyasi tomonidan so’nggi yetti yilini o’tkazgan Ekvador elchixonasida hibsga olingan edi. 2012-yilda Assanj Shvetsiyada zo’rlashda ayblanib, Ekvador rasmiylaridan siyosiy boshpana so’rashga majbur bo’lgan. Londondagi Ekvador elchixonasida qariyb yetti yil o’tkazgandan so’ng, u boshpana shartlarini buzganlikda aybdor deb topilgan. Buning uchun Assanj 12 oygacha qamoq jazosiga hukm qilinishi mumkin.
11-aprel kuni AQSh rasmiylari WikiLeaks asoschisini AQSh armiyasining sobiq harbiy tahlilchisi Chelsi Manningga (sobiq Bredli Manning) maxfiy ma’lumotlarga kirish uchun hukumat kompyuter parolini buzib kirishda yordam berganlikda aybladi. U bu ayblov bo’yicha besh yilgacha qamoq jazosiga hukm qilinishi mumkin.
Ayni paytda, Shvetsiya Assanjni ekstraditsiya qilishni so’rashda davom etmoqda. Britaniya qonunlariga ko’ra, bir nechta davlatlar ayblanuvchini ekstraditsiya qilishni so’raganda, yakuniy qarorni Ichki ishlar vaziri qabul qiladi.
The Guardian nashrining yozishicha, WikiLeaks Lenin Morenoning akasini offshor kompaniya tuzishda ayblagan va prezident va uning oilasining shaxsiy fotosuratlarini nashr etgan anonim veb-saytga aloqador bo’lgan. Moreno Assanjning boshpana berishdan bosh tortishi uning oilasi haqidagi ma’lumotlarni nashr etish bilan bog’liq emasligini aytdi. Prezident shuningdek, WikiLeaks asoschisi Ekvador elchixonasidan boshqa mamlakatlarda demokratiyani buzish uchun foydalanganidan afsusda ekanligini bildirdi.
«Biz o’z hududimizdan va avvalgi hukumatning ruxsati bilan Londondagi Ekvador elchixonasiga boshqa davlatlar ishlariga aralashish uchun resurslar taqdim etilganidan chuqur afsusdamiz. Biz o’z uyimiz – eshiklarini ochgan uy – josuslik markaziga aylanishiga yo’l qo’yolmaymiz. Bunday faoliyat boshpana shartlarini buzadi. Bizning [Assanjning boshpanasini bekor qilish – tahr.] qarorimiz o’zboshimchalik emas, balki xalqaro huquqqa asoslangan», dedi Moreno The Guardian nashriga.
