Ekvador WikiLeaks va «rus xakerlari»ni mamlakat hukumatini beqarorlashtirishga urinishda aybladi.
Prokurorlar Assanj bilan bog’liq ikki gumon qilingan rossiyalik xakerning mamlakatdan chiqib ketishini taqiqlashi mumkin.
Ekvador hukumati WikiLeaks va rossiyalik xakerlarni mamlakatni beqarorlashtirishga urinishda aybladi. Rasmiylar shuningdek, o’tgan payshanba kuni Londonda Britaniya huquq-tartibot idoralari tomonidan hibsga olingan WikiLeaks asoschisi Julian Assanjning fuqaroligini bekor qilishdi. Hozirda qaysi «rus xakerlari» haqida gap ketayotgani noma’lum. Ekvador ichki ishlar vaziri Mariya Paula Romoning so’zlariga ko’ra, rasmiylar WikiLeaks va Julian Assanj bilan bog’liq deb taxmin qilingan xakerlar haqida yangi ma’lumotlarga ega emaslar, ammo ular hali ham mamlakatda ekanligi ma’lum.
«Ular hozirda mamlakatda. Biz prokuratura bilan ma’lumot almashmoqdamiz. Prokuratura, o’z navbatida, agar bunga asos bor deb hisoblasa, suddan ularga nisbatan cheklov choralarini qo’llashni so’rashi mumkin», dedi Roma Sonorama radiosida.
2006-yilda Julian Assanj tomonidan asos solingan WikiLeaks sayti Qo’shma Shtatlar kabi hukumat faoliyati haqida maxfiy ma’lumotlarni e’lon qiladi. 2012-yilda Assanj Shvetsiya rasmiylari tomonidan jinsiy zo’ravonlik ayblovlari bilan duch kelganidan so’ng, Londondagi Ekvador elchixonasidan boshpana so’ragan va shu yilning 11-aprelida hibsga olingunga qadar shu yerda qolgan. Qo’shma Shtatlarda Assanj sobiq harbiy tahlilchi Chelsi Manning bilan maxfiy ma’lumotlarni o’z ichiga olgan hukumat kompyuterlarini buzib kirish uchun til biriktirganlikda ayblanmoqda. Ayblovlarga ko’ra, Assanj besh yilgacha qamoq jazosiga hukm qilinishi mumkin.
