Facebook o’z ilovalarini Huawei smartfonlariga oldindan o’rnatishni taqiqladi.
Taqiq avvalroq AQSh tomonidan Xitoy korporatsiyasiga nisbatan joriy qilingan cheklovlar bilan bog‘liq.
Facebook kompaniyasi Xitoyning Huawei kompaniyasi tomonidan ishlab chiqarilgan smartfonlarga o‘z ilovalarini (Facebook, Instagram va WhatsApp) oldindan o‘rnatishni taqiqladi, deb xabar berdi Reuters o‘z manbalariga tayanib. Axborot agentligi maʼlumotlariga koʻra, mavjud qurilmalar egalari hali ham ilovalardan foydalanishlari va yangilanishlarni olishlari mumkin, biroq yangi Huawei smartfonlari endi Facebook, Instagram va WhatsApp bilan yetkazib berilmaydi. Bu taqiq avvalroq AQSh tomonidan Xitoy korporatsiyasiga nisbatan joriy qilingan cheklovlardan kelib chiqadi. Xususan, Huawei’ga Amerika kompaniyalaridan butlovchi qismlar va dasturiy ta’minot sotib olish taqiqlangan.
Google avvalroq Huawei smartfonlari uchun dasturiy ta’minotni taqdim etishdan bosh tortgan edi. Keyinchalik kompaniya ushbu qurilmalar uchun yangilanishlar AQSh hukumati tomonidan berilgan vaqtinchalik litsenziya asosida 90 kun davomida mavjud bo’lishini aytdi. Ushbu litsenziyaning amal qilish muddati avgust oyida tugaydi. Qaror barcha Huawei smartfonlariga, shu jumladan hali bozorga chiqmagan smartfonlariga ham tegishli.
Bundan tashqari, Intel, Qualcomm, Xilinx, Broadcom va Britaniyaning ARM kompaniyasi Huawei bilan biznes aloqalarini to’xtatganliklarini e’lon qilishdi. Microsoft, shuningdek, Xitoy kompaniyasi bilan hamkorlikni cheklash rejalarini ham e’lon qildi.
