Facebook «tasodifan» 1,5 million foydalanuvchining elektron pochta aloqa ro’yxatini to’pladi
2016-yil may oyidan beri ijtimoiy tarmoq yangi foydalanuvchilarning xabarisiz akkauntlarni ro’yxatdan o’tkazganlarida ulardan aloqa ma’lumotlarini to’plab kelmoqda.
Facebook 1,5 million foydalanuvchining elektron pochta kontakt ro’yxatlarini ularning xabarisiz yoki ruxsatisiz to’pladi. Business Insider xabar berishicha, ijtimoiy tarmoq 2016-yil may oyidan beri yangi foydalanuvchilar o’z akkauntlarini ro’yxatdan o’tkazganlarida kontaktlarni to’plab kelgan. Facebook ma’lumotlar to’plash bexosdan amalga oshirilganini da’vo qilmoqda va endi uni o’chirib tashlamoqda. Ma’lumotlar to’plash haqida birinchi marta xavfsizlik bo’yicha tadqiqotchi «e-sushi» taxallusidan foydalangan holda xabar bergan. Uning ta’kidlashicha, ijtimoiy tarmoqda yangi akkauntlarni ro’yxatdan o’tkazishda Facebook ba’zi foydalanuvchilardan shaxsini tasdiqlash uchun elektron pochta parollarini so’ragan. Keyinchalik Business Insider jurnalistlari aniqlaganidek, parolni kiritgandan so’ng, ularning kontaktlari import qilinayotgani haqida xabar beruvchi bildirishnoma paydo bo’ldi. Foydalanuvchidan ma’lumotlarni import qilish uchun ruxsat so’ralmagan.
Yaqin vaqtgacha bu ma’lumotlar nima uchun, ayniqsa ruxsatsiz to’planayotgani noma’lum edi. Biroq, 17-aprel, chorshanba kuni Facebook vakillari vaziyatga oydinlik kiritishdi. Ularning ta’kidlashicha, kompaniya yuqorida tavsiflangan usuldan foydalanib, foydalanuvchilarining kontakt ro’yxatlarini to’plagan, keyin esa ular maqsadli reklama, ijtimoiy tarmoqlar va tavsiya etilgan do’stlar ro’yxatini yaxshilash uchun Facebook tizimlariga kiritilgan.
Kompaniya tushuntirganidek, 2016-yil may oyigacha ijtimoiy tarmoq foydalanuvchilari o’z akkauntlarini parol bilan tasdiqlashlari va kontaktlarni yuklab olish uchun ixtiyoriy ravishda ruxsat berishlari mumkin edi. Biroq, keyinchalik kompaniya ushbu imkoniyatni olib tashlashga qaror qildi. Kontaktlarni yuklab olish haqidagi bildirishnoma olib tashlandi, ammo funksiya ishlashda davom etdi.
Kompaniya vakillarining so’zlariga ko’ra, Facebook elektron pochta yozishmalarining mazmuniga kirish huquqiga ega bo’lmagan, kontaktlar ro’yxatini hech kimga o’tkazmagan va endi ularni o’chirib tashlamoqda.
