Fishing firibgarlari Hindistonning IT giganti Wipro tarmoqlariga kirib kelishdi.
Hujumchilar kompaniya tarmoqlarini buzib kirishdi va u yerdan mijozlariga fishing hujumlarini amalga oshirishdi.
Seshanba, 16-aprel kuni Hindistonning IT giganti Wipro o’z tizimlariga kiberhujum sodir etilganini tasdiqladi. Kompaniya hozirda xavfsizlik tadqiqotchilari bilan birgalikda hodisani tekshirmoqda. Jurnalist Brayan Krebs 15-aprel kuni bu voqea haqida birinchi bo’lib xabar bergan. Uning so’zlariga ko’ra, hujumchilar Wipro axborot tizimlarini buzib kirishgan va ulardan kompaniyaning bir nechta mijozlariga hujum qilish uchun foydalanganlar. Krebsning manbalariga ko’ra, IT giganti bir necha oydan beri hukumat tomonidan homiylik qilingan kiberjinoyatchilarning ishi deb hisoblangan hujum bilan kurashmoqda.
Ikkala manba ham Wipro ichki tizimlaridan hujumchilar tomonidan kamida o’nlab mijozlariga fishing hujumlarini amalga oshirish uchun foydalanilganini tasdiqladi. Xavfsizlik bo’yicha mutaxassislarning so’zlariga ko’ra, kompaniya mijozlari zararli va shubhali faoliyatni Wipro tarmog’iga to’g’ridan-to’g’ri ulangan sherik tizimlarida kuzatgan. Bir manbaning ta’kidlashicha, kompaniya hatto o’zining elektron pochta infratuzilmasini qayta tiklashga majbur bo’lgan, chunki avvalgisi bir muncha vaqt oldin buzib kirilgan edi.
«Biz tarmog’imizdagi bir nechta xodimlarning akkauntlarida murakkab fishing kampaniyasi bilan bog’liq potentsial g’ayritabiiy faoliyatni aniqladik», deb aytishdi Wipro vakillari Reuters agentligiga elektron pochta orqali. Kompaniya sherik tizimlari buzilganmi yoki yo’qmi, aniqlik kiritmadi.
Wipro’ning o‘ziga ko‘ra, u 170 000 dan ortiq odamni ish bilan ta’minlaydi va uning mijozlari orasida butun dunyo bo‘ylab Fortune 500 ro‘yxatiga kiritilgan kompaniyalar bor. 2018-yil mart holatiga ko‘ra, Wipro’ning yillik daromadi 8 milliard dollardan oshdi.
