FQB xodimlari kiber tahdidlar kuchayib borayotgani sababli qayta tayyorlashdan o’tmoqda
Xodimlarni bunday miqyosda qayta tayyorlash oxirgi marta 2001-yilda, 11-sentabr terroristik hujumlaridan keyin amalga oshirilgan edi.
FQB AQShning iqtisodiy va siyosiy manfaatlariga tahdid soluvchi raqiblar tomonidan homiylik qilingan kiberhujumlar sonining ortib borishiga javoban o’zining maxsus agentlarini keng ko’lamli qayta tayyorlashni amalga oshirmoqda. FQBning Kiberjinoyatchilik bo’limi boshlig’i Emi Xessning so’zlariga ko’ra, byuro o’z agentlarini oxirgi marta 2001-yilda, 11-sentabr terroristik hujumlaridan keyin bunday keng ko’lamda qayta o’qitgan. «Men FQBda jinoiy tergov ishlari bilan shug’ullanib ulg’ayganman. Zo’ravonlik jinoyatlari, to’dalar va giyohvand moddalar bilan shug’ullanganman. Keyin 11-sentabr voqealari sodir bo’ldi va biz hammamiz terrorizmga qarshi kurashga o’tdik. Hozir ham xuddi shunday holat yuz bermoqda», deb ta’kidladi Xess The Wall Street Journal nashriga bergan intervyusida.
Rivojlanayotgan tahdidlar FQB faoliyatida o’zgarishlarni talab qiladi. Third Way xalqaro tadqiqot tashkilotining ma’lumotlariga ko’ra, huquqni muhofaza qilish organlari kiberhujumlarning atigi 1 foiziga javob beradi va faqat eng muhimlarini, masalan, xorijiy hukumatlar tomonidan homiylik qilingan kiberhujumlarni yoki murakkab transmilliy jinoiy sxemalarni tekshiradi.
Aspen institutining Kiberxavfsizlik va texnologiyalar dasturi ijrochi direktori Garrett Graff ta’kidlaganidek, kiber resurslar nuqtai nazaridan byuro ehtiyojidan bir-ikki baravar past. So’nggi yutuqlarga qaramay, FQBning atigi to’rt yoki beshta dala ofisi murakkab kiberjinoyatlarga qarshi kurashish uchun resurslar va tajribaga ega.
FQB 1908-yilda Adliya vazirligi tarkibida fohishalik, qalbaki pullar va bank o’g’irliklariga qarshi kurashish uchun kichik bo’lim sifatida tashkil etilgan. Vaqt o’tishi bilan byuro jinoiy faoliyat, josuslik va giyohvand moddalar savdosiga qarshi kurashuvchi mustaqil agentlikka aylandi. 11-sentabr hujumlaridan so’ng, FQB o’z e’tiborini terrorizmga qarshi kurashga qaratdi va uning ustuvor vazifasi Qo’shma Shtatlar va xorijdagi terroristik tarmoqlarni barbod qilish edi. 2001-yilda agentlik xodimlarining kamchiligida kompyuterlar bor edi va deyarli 20 yil davomida byuro o’zining texnologik imkoniyatlarini oshirishga sarfladi.
Raqamli texnologiyalarning yuksalishi jinoyatchilikning evolyutsiyasiga va yangi tahdidlarning paydo bo’lishiga olib keldi. «Tashkilotning (FBI – tahr.) kelajagi raqamli. Bu butun dunyoning kelajagi», deb ta’kidladi Xess.
