Germaniya o’zining kiber imkoniyatlarini NATO bilan baham ko’radi.
Germaniya mudofaa vazirlari uchrashuvi davomida o’zining kiber imkoniyatlarini blokdagi ittifoqchilariga taqdim etishini e’lon qildi.
Agence France-Presse xabar berishicha, Germaniya kiberhujumlar va elektron urushga qarshi kurashishda yordam berish uchun alyansga kiber imkoniyatlarni taqdim etayotgan NATO davlatlari qatoriga qo’shildi. NATO kiberfazoni quruqlik, dengiz va havo bilan bir qatorda mojarolar maydoni sifatida belgilaydi, chunki bu milliy davlatlar, kiberjinoyatchilar va «xakerlar» deb ataladiganlar tomonidan elektron hujumlarning tobora ko’payib borishi, shuningdek, ushbu tahdidlarning potentsial oqibatlari bilan bog’liq.
«Biz NATOga armiyamiz, havo kuchlarimiz va dengiz flotimizni taqdim etganimiz kabi, endi biz mavjud milliy va huquqiy asoslarimiz doirasida kiber imkoniyatlarni ham taqdim eta olamiz», dedi Germaniya mudofaa vaziri Ursula fon der Lyayen 14-fevral kuni Bryusselda bo’lib o’tgan mudofaa vazirlari sammitida.
Qo’shma Shtatlar, Buyuk Britaniya, Daniya, Niderlandiya va Estoniya allaqachon ittifoqqa o’zlarining hujumkor kiberqurollarini taqdim etishga tayyor davlatlar qatorida. Qarshi hujum tahdidi potentsial tajovuzkorlarni to’xtatishi kutilmoqda.
Kiberhujumlar internetga ulangan har qanday obyektni, kompyuterlar va smartfonlardan tortib, elektr stansiyalari va transport tarmoqlaridagi asosiy mexanizmlarni boshqaradigan qurilmalargacha nishonga olishi mumkin.
