Google GDPR qoidalarini buzgani uchun 50 million yevro jarimaga tortildi
Kompaniya foydalanuvchilarning shaxsiy ma’lumotlarini qayta ishlash va saqlashda shaffoflik yo’qligi uchun jarimaga tortildi.
Fransiyaning Axborot texnologiyalari va inson huquqlari bo’yicha milliy komissiyasi (CNIL) Google kompaniyasini foydalanuvchilarning shaxsiy ma’lumotlarini qayta ishlash va ulardan foydalanishga rozilik olishda shaffoflikka oid Umumiy ma’lumotlarni himoya qilish reglamenti (GDPR) qoidalarini buzgani uchun 50 million yevro jarimaga tortdi. Agentlik ma’lumotlariga ko’ra, bu CNILning Yevropa Ittifoqi ma’lumotlarni himoya qilish to’g’risidagi qonunida nazarda tutilgan maksimal jarimani birinchi marta qo’llaganidir. 2018-yil may oyi oxirida None of Your Business va La Quadrature du Net tashkilotlari Google kompaniyasini foydalanuvchilarning shaxsiy ma’lumotlarni taqdim etishga roziligini majburlashda aybladi.
«Biz Yevropa ma’lumotlarni himoya qilish organi GDPR vakolatlaridan birinchi marta qonunni qo’pol ravishda buzganlik uchun jazolashda foydalanayotganidan xursandmiz», dedi «None Of Your Business» tashkiloti faoli Maks Shrems.
O’tgan yilning sentyabr oyida fransuz regulyatori yangi Android smartfonida Google akkaunti yaratishda foydalanuvchilarga taqdim etilgan ma’lumotlarni tekshirdi. Agentlik zarur ma’lumotlarga kirish ba’zan besh yoki olti bosqichgacha davom etishi va matn har doim ham aniq emasligi haqida xulosaga keldi. Bundan tashqari, Google foydalanuvchi ma’lumotlaridan qanday foydalanish borasida juda noaniq edi va ma’lumotlarni saqlash muddati haqida ma’lumot bermadi. Oxir-oqibat, agentlik kompaniya foydalanuvchilardan o’z ma’lumotlarini qayta ishlash uchun aniq va bir xil rozilik olmaganini ta’kidladi.
Ilgari Fransiyada shaxsiy ma’lumotlarni himoya qilish to’g’risidagi qonunlarni buzganlik uchun maksimal jarima atigi 150 000 yevroni tashkil etardi. GDPR kuchga kirishidan ikki yil oldin u 3 million yevrogacha ko’tarilgan edi. Endi, yangi pan-yevropa qonuni kuchga kirishi bilan, maksimal jarima 20 million yevroni yoki kompaniyaning global yillik daromadining 4 foizini tashkil etadi.
