Google Xaritalar tasodifan Tayvanning maxfiy harbiy bazalari joylashgan joyni oshkor qildi.
Tasvirlarda Sindian okrugidagi Patriot havo mudofaasi tizimlari joylashtirilgan maxfiy harbiy bazaning joylashuvi va tuzilishi aniq ko’rsatilgan.
Tayvan rasmiylari mamlakatning maxfiy harbiy bazalari Google Xaritalarida paydo bo’lganidan keyin harbiy xavfsizlik bilan bog’liq janjalni yashirishga harakat qilmoqda. Ilova o’tgan chorshanba kuni Tayvanning to’rtta yirik shahri: Taypey, Yangi Taypey shahri, Taoyuan va Taychuan xaritalari bilan yangilandi. Mahalliy OAVlarning xabar berishicha, tasvirlarda Sindian okrugidagi (Yangi Taypey shahri) Patriot havo mudofaasi raketa tizimlari joylashgan maxfiy harbiy bazaning joylashuvi va tuzilishi, jumladan, uchirish moslamalari va raketa modellari aniq ko’rsatilgan.
Google Xaritalar shuningdek, tasodifan Milliy xavfsizlik byurosi va Mudofaa razvedkasi byurosining batafsil xavfsizlik infratuzilmasini oshkor qildi. Tayvan mudofaa vaziri Yen Te-fa agentlik Google’ga tasvirlarni xiralashtirish bo‘yicha rasmiy so‘rov yuborganini e’lon qildi.
Rasmiyning so’zlariga ko’ra, bazalarning joylashuvini oshkor qilish harbiy operatsiyalarga ta’sir qilmaydi. «Aslida, bazaning mudofaa infratuzilmasi tinchlik davrida urush davridagi infratuzilmadan farq qilishi mumkin», deb ta’kidladi Yen.
Tayvan rasmiylari ilgari Google’ga shunga o‘xshash hodisalar bo‘yicha so‘rovlar yuborgan edi. 2016-yilda Mudofaa vazirligi kompaniyadan Google Xaritalarida Tayping orolining (Itu Aba) bir qismini xiralashtirishni so‘radi va to‘rtta yangi harbiy inshootni ko‘rsatdi.
