Google’dan keyin yana to‘rtta kompaniya Huawei bilan hamkorlikni to‘xtatdi.
Intel, Qualcomm, Xilinx va Broadcom Xitoy korporatsiyasi bilan biznes aloqalarini to’xtatdi.
Intel, Qualcomm, Xilinx va Broadcom Xitoy korporatsiyasi bilan biznes aloqalarini to’xtatdi.
Yirik Amerika korporatsiyalari Xitoyning Huawei Technologies telekommunikatsiya kompaniyasi «qora ro’yxat»ga kiritilganidan so’ng, unga o’z mahsulotlari va dasturiy ta’minotini yetkazib berishni to’xtatmoqda – bu ro’yxatda Amerika kompaniyalari o’z aloqalarini cheklashi yoki butunlay yo’q qilishi shart bo’lgan kompaniyalar ro’yxati mavjud. Bloomberg agentligining xabardor manbalarga tayanib xabar berishicha, Huawei bilan biznes qilishdan bosh tortayotgan kompaniyalar qatoriga Intel Corp., Qualcomm Inc., Xilinx Inc. va Broadcom Inc. kiradi. Ularning barchasi o’z xodimlariga AQSh rasmiylaridan xabarnoma olmaguncha Huaweiga ta’minot bermasliklari haqida xabar berishgan.
Google ilgari Huawei bilan biznes hamkorligini to’xtatgan edi. Reuters agentligiga ma’lum bo’lishicha, Huawei endi Google xizmatlari va dasturlaridan, jumladan, Google Play ilovalar do’konidan, YouTube va Gmaildan foydalana olmaydi. Xitoy kompaniyasi Amerika kompaniyasining mulkiy texnologiyalari va dasturiy ta’minotidan foydalanish huquqini yo’qotadi va faqat Android operatsion tizimining ochiq kodli versiyasidan foydalanishi mumkin bo’ladi.
Google vakillarining so’zlariga ko’ra, mavjud ilovalar o’rnatilgan Huawei smartfonlari egalari ulardan foydalanishda va yangilanishlarni yuklab olishda davom etishlari mumkin.
O’tgan hafta AQSh prezidenti Donald Tramp mamlakatning axborot va kommunikatsiya tarmoqlarini himoya qilish uchun hukumat vakolatlarini kengaytirish maqsadida milliy favqulodda holat e’lon qilish to’g’risidagi farmonni imzoladi. Xususan, farmon Amerika kompaniyalariga AQSh milliy xavfsizligiga xavf tug’diradigan xorijiy ishlab chiqaruvchilardan uskunalar sotib olishni taqiqlaydi.
Eslatib o’tamiz, shu yilning mart oyida Huawei bosh direktori Richard Yu texnologiya giganti Android va Windows operatsion tizimlaridan foydalanib bo’lmaydigan holatlarda o’z operatsion tizimini tayyorlaganini e’lon qildi. U tafsilotlarni bermadi, faqat ishlab chiqish ham kompyuterlar, ham smartfonlar uchun mos kelishini ta’kidladi.
