Huawei AQSh bilan mojaro tufayli Android va Windows’ga alternativa ishlab chiqdi
Operatsion tizim ham kompyuterlar, ham smartfonlar uchun mos keladi.
Xitoyning Huawei Technologies kompaniyasi AQSh rasmiylari bilan mojaro tufayli Android va Windows’dan foydalana olmaydigan bo‘lib qolsa, o‘z operatsion tizimini ishlab chiqdi. Kompaniya bosh direktori Richard Yu bu haqda Germaniyaning Die Welt nashriga bergan intervyusida ma’lum qildi. “Biz o‘z operatsion tizimimizni ishlab chiqdik. Agar biz ushbu tizimlardan [Android va Windows] foydalana olmasligimiz ma’lum bo‘lsa, bizda B rejasi bo‘ladi”, dedi Yu. U ishlab chiqish tafsilotlarini oshkor qilmadi, ammo u ham kompyuterlar, ham smartfonlar uchun mos kelishini ta’kidladi.
Texnologiya giganti muqobil operatsion tizim ustida ishlay boshlagan, 2012-yilda, AQSh hukumati Xitoy hukumati foydasiga josuslik qilishda gumon qilinayotgan Huawei va uning raqibi ZTE kompaniyalariga qarshi tergov olib borayotgan bir paytda.
Joriy yilning mart oyi boshida Huawei AQSh hukumatiga qarshi bozor raqobati tamoyillarini buzganlikda ayblab, sudga murojaat qildi. Xitoy kompaniyasi AQSh hukumat idoralari va ularning pudratchilariga xitoylik ishlab chiqaruvchilardan uskunalar sotib olishni taqiqlovchi Milliy mudofaa vakolatlari to’g’risidagi qonunning (NDAA) 889-bo’limi konstitutsiyaga zid deb hisoblaydi.
AQSh rasmiylari xavfsizlik muammolari tufayli boshqa hukumatlarni beshinchi avlod (5G) mobil tarmoqlarini qurishda Huawei uskunalaridan foydalanmaslikka chaqirdi. Ularning fikricha, kompaniya Xitoy milliy razvedkasi bilan hamkorlik qilayotgan va uning uskunalaridan kiberjosuslik uchun foydalanayotgan bo’lishi mumkin. Bundan tashqari, AQSh xavfsizlik mutaxassislari ishlab chiqaruvchining suv osti kabellarini yotqizishdagi ishtiroki haqida xavotir bildirishdi. Ularning fikricha, Huawei uskunalari Xitoy hukumatiga trafikni ushlab qolish va hatto internet operatsiyalariga xalaqit berish imkonini berishi mumkin.
