Huawei operatsion tizimini ishlab chiqish tafsilotlari e’lon qilindi.
Yangi operatsion tizim «Hongmeng» deb nomlandi.
Xitoyning Huawei telekommunikatsiya kompaniyasi Android va Windows ishlatib bo’lmaydigan holatga tushib qolgan taqdirda o’z qurilmalari uchun ishlab chiqqan operatsion tizimning dastlabki nomini e’lon qildi. Yangi operatsion tizim «Hongmeng» deb nomlanadi, ammo bu loyihaning kod nomimi yoki u chiqariladigan yakuniy mahsulot nomimi noma’lum. Huawei Central ma’lumotlariga ko’ra, yangi operatsion tizim Linux asosidagi va ko’p platformali bo’lib, mobil qurilmalar va noutbuklar uchun mos keladi. Mish-mishlarga ko’ra, ushbu operatsion tizimni ishlab chiqish 2012-yildan beri davom etmoqda.
Nashr manbasining so’zlariga ko’ra, Huawei allaqachon operatsion tizimni sinovdan o’tkazmoqda, ammo mahsulotning tayyorlik holati hali noma’lum, garchi kompaniyaning top-menejerlari ilgari uning ishlab chiqilishi deyarli yakunlanganini ishora qilgan bo’lsalar ham.
Eslatib o’tamiz, Google yaqinda AQSh prezidenti Donald Trampning milliy favqulodda holat e’lon qilish haqidagi farmoni va AQSh Savdo vazirligining Huaweini qora ro’yxatga kiritganidan so’ng Huawei bilan hamkorlikni to’xtatdi. Ushbu to’xtatib turish Huawei kompaniyaning Google Play, YouTube va Gmail kabi xususiy texnologiyalari va xizmatlaridan foydalanish imkoniyatini yo’qotishini va Androidning ochiq kodli versiyasidan foydalanish bilan cheklanishini anglatadi. OAV xabarlariga ko’ra, Intel, Qualcomm, Xilinx va Broadcom ham Huawei bilan hamkorlikni to’xtatgan.
20-may kuni AQSh Savdo vazirligi Huawei bilan biznes yuritish uchun vaqtinchalik umumiy litsenziyani e’lon qildi. 90 kunlik (19-avgustgacha) amal qiladigan vaqtinchalik umumiy litsenziya kompaniyaning AQShda ishlatiladigan mobil qurilmalari uchun tarmoqqa texnik xizmat ko’rsatish va dasturiy ta’minotni yangilash huquqini yangilaydi.
