ICANN internetning asosiy elementlariga tahdid solishi mumkinligidan xavotirda.
So’nggi paytlarda DNSga qilingan potentsial hujumlar axborot xavfsizligi mutaxassislari orasida katta tashvishga sabab bo’lmoqda.
ICANN vakillari 22-fevral, juma kuni Agence France-Presse (AFP) agentligiga bergan intervyusida global internet infratuzilmasining asosiy elementlari keng ko’lamli kiberhujumlar tahdidi ostida ekanligini aytishdi.
AFP xabariga ko’ra, ICANN internet infratuzilmasining asosiy elementlariga «doimiy yuqori xavf» tug’dirishi sababli favqulodda yig’ilish o’tkazdi. Korporatsiyaning bosh texnologiya direktori Devid Konradning so’zlariga ko’ra, hujumchilar global tarmoqni qo’llab-quvvatlaydigan infratuzilmani nishonga olishmoqda. «Ilgari ham hujumlar bo’lgan, ammo bunga o’xshash narsa yo’q edi», deb ta’kidladi Konrad.
Hujumlar 2017-yilda boshlangan, ammo endigina ular xavfsizlik tadqiqotchilari uchun tashvishga aylandi va favqulodda yig’ilish chaqirishga sabab bo’ldi. Hujumchilar DNS-ni nishonga olishmoqda, bu ICANN mutaxassislarining fikriga ko’ra, ularga trafikni ushlab qolish, uni boshqa joyga yashirincha yo’naltirish va muhim veb-saytlarni soxtalashtirish imkonini berishi mumkin.
FireEye kompaniyasining katta kiberjosuslik bo’yicha tahlilchisi Ben Ridning so’zlariga ko’ra, DNSpionage deb nomlangan hujumlar 2017-yilda boshlangan. Hujumchilar asosan Yaqin Sharqdagi domen nomlarini ro’yxatdan o’tkazuvchilar va internet-provayderlarning hisob ma’lumotlarini tortib olishadi. Hujumlar ortida Eron hukumati nomidan ish olib borayotgan eronlik xakerlar turgan deb ishoniladi.
«Bu muammoni hal qilish uchun yagona vosita yo’q», dedi Konrad. Shuning uchun ICANN mutaxassislarni internet infratuzilmasining xavfsizligini umuman kuchaytirishga chaqirmoqda.
Eslatib o’tamiz, o’tgan oy AQSh Ichki xavfsizlik departamenti ham DNS hujumlaridan himoyalanishga chaqiruvchi «favqulodda ko’rsatma» chiqargan edi.
