Microsoft Huawei bilan hamkorlikni yakunlashni rejalashtirmoqda.
Amerikalik kompaniya tegishli xatlarni, jumladan Rossiya Federatsiyasidagi vakolatxonalarga ham, turli mamlakatlarga yubordi.
Microsoft Huawei bilan hamkorlik qilishni rad etgan amerikalik kompaniyalar ro’yxatiga qo’shilmoqchi. Bu haqda 22 may, chorshanba kuni Kommersant gazetasi xabar berdi. O’tgan hafta AQSh Prezidenti Donald Tramp AQSh milliy xavfsizligiga xavf solishi mumkin bo’lgan chet el ishlab chiqaruvchilardan uskuna sotib olishni amerikalik kompaniyalarga taqiqlovchi ijro etuv qarorni imzoladi. Shu bilan birga, AQSh Savdo vazirligi Huawei va unga aloqador 70 ta kompaniyani amerikalik korxonalar bilan aloqalarni cheklash yoki to’liq to’xtatish talab qilinadigan tashkilotlar ro’yxatiga kiritdi.
Huawei bilan hamkorlik qilishni rad etgan tashkilotlar ro’yxatiga Intel, Qualcomm, Xilinx, Broadcom va Google kiradi. Ularning barchasi AQSh hokimiyatlaridan yangi bildirishnoma kelguncha Huawei’ga yetkazib berishni to’xtatish to’g’risida xodimlarini allaqachon xabardor qilgan.
Microsoftga kelsak, texnologiya giganti hali Xitoy kompaniyasi bilan hamkorlik rejalarini rasman oshkor qilishga shoshilmayapti. Biroq, Rossiya telekommunikatsiya bozoridagi ikkita manbaning «Kommersant» nashriga aytishicha, Microsoft Huawei bilan iste’molchi elektronikasi va B2B yechimlari segmentlaridagi hamkorlikni to’xtatish niyatida.
Bir manbaga ko’ra, Amerika texnologiya giganti allaqachon Rossiya kabi turli mamlakatlardagi vakolatxonalariga tegishli xatlar yuborgan. Manba shuningdek, bundan buyon Microsoftning mintaqaviy ofislari va Huawei o’rtasidagi barcha aloqalar bosh ofis orqali amalga oshirilishini ta’kidladi. Ikkinchi manba nashrga kompaniyaning Rossiyadagi bir nechta hamkorlari Huawei bilan hamkorlikni to’xtatish rejalari haqida xatlar va norasmiy ogohlantirishlar olganini aytdi.
