Microsoft Windows 10 Home’da yangilanishlarni to‘xtatib turish imkoniyatini tasdiqladi.
Keyingi oydan boshlab yangi funksiya Windows 10 ning barcha versiyalari foydalanuvchilari uchun mavjud bo’ladi.
SecurityLab avvalroq xabar berganidek, Microsoft Windows 10 ga (1903-versiya) foydalanuvchilarga yangilanishlarni kechiktirish imkonini beruvchi funksiya qo’shishni rejalashtirgan edi. Endi kompaniya keyingi oydan boshlab barcha foydalanuvchilar (shu jumladan Home SKU foydalanuvchilari) yangilanishlarni 35 kungacha kechiktirishlari mumkinligini rasman tasdiqladi. Ushbu funksiya birinchi marta shu yilning yanvar oyida OT ning Insider versiyalarida paydo bo’lgan, ammo yangilanishlarni faqat yetti kunga kechiktirish mumkin edi. Hozirgacha u faqat Windows 10 Pro va Enterprise foydalanuvchilari uchun mavjud edi, ammo 2019-yil may oyidan boshlab Windows 10 versiyasidan qat’i nazar, hamma ushbu funksiyadan foydalanishi mumkin bo’ladi. Bundan tashqari, nafaqat funksiya yangilanishlarini, balki oylik (kumulyativ) yangilanishlarni ham kechiktirish mumkin bo’ladi.
«Foydalanuvchilarning fikr-mulohazalariga asoslanib, biz yangilanishlar noqulay paytlarda, masalan, taqdimot uchun kompyuteringiz kerak bo’lganda kelishi mumkinligini bilamiz. Shuning uchun biz foydalanuvchilar uchun funksiya va oylik yangilanishlarni 35 kungacha (bir vaqtning o’zida yetti kun, ularni besh martagacha kechiktirish imkoniyati bilan) to’xtatib turish imkoniyatini joriy qilmoqdamiz. 35 kundan so’ng, foydalanuvchilar yangilanishlarni o’rnatishlari kerak bo’ladi, shundan so’ng ular yana kechiktirish imkoniyatiga ega bo’ladilar», dedi Microsoft.
Windows 10 ning keyingi funksiya yangilanishi 2019-yil may oyidagi yangilanish deb nomlanadi va yakuniy versiyasi allaqachon tayyor bo’lsa-da, Microsoft uni yana bir muddat sinab ko’rmoqchi. Oldindan ko’rish versiyasi shu hafta chiqariladi va yakuniy versiyadan bir oy oldin sinovdan o’tkaziladi.
