NSA o’zining kuzatuv dasturini tugatishni ko’rib chiqmoqda.
AQSh Milliy xavfsizlik agentligi olti oydan beri ushbu dasturdan foydalanmayapti.
Vakillar palatasidagi Respublikachilar ko’pchilik yetakchisining milliy xavfsizlik bo’yicha maslahatchisi Lyuk Myurreyning so’zlariga ko’ra, AQSh Milliy xavfsizlik agentligi (NSA) Amerika fuqarolarining telefon qo’ng’iroqlari va SMS xabarlarini tinglash dasturini amaliy qiymati yo’qligi sababli jimgina o’chirib qo’ydi. 2001-yil 11-sentabrdagi terroristik hujumlardan keyin ishga tushirilgan dastur 2013-yilda NSAning sobiq pudratchisi Edvard Snouden tomonidan taqdim etilgan hujjatlar e’lon qilinganidan keyin fosh bo’ldi.
Myurreyning aytishicha, Milliy xavfsizlik agentligi bir necha oydan beri dasturdan foydalanmayapti va prezident Donald Tramp Kongressdan dasturni shu yil oxirida yangilashni so’rashni rejalashtirmayapti.
“Maʼmuriyat maʼlumotlarni toʻplash usullari haqidagi xavotirlar tufayli soʻnggi olti oy davomida undan [dasturdan] foydalanmadi. Soʻnggi olti oydagi pozitsiyasini hisobga olgan holda, maʼmuriyat uni qayta tiklashni xohlashiga amin emasman”, deb taʼkidladi Myurrey.
NSA va Oq uy vakillari hozircha vaziyat bo’yicha izoh berishmadi.
Mavjud ma’lumotlarga ko’ra, agentlikning kuzatuvni cheklash bo’yicha sa’y-harakatlariga qaramay, NSA 2017-yilda kamida 534 million telefon qo’ng’iroqlarini kuzatgan. Bu ko’rsatkich 2016-yilga nisbatan uch baravar ko’p edi.
