Roskomnadzor (Aloqa, axborot texnologiyalari va ommaviy axborot vositalarini nazorat qilish federal xizmati) suveren RuNet to’g’risidagi qonun doirasida ishlashga tayyorligini e’lon qildi.
Qonun loyihasini amalga oshirishga tayyorgarlik ishlari telekommunikatsiya operatorlari bilan hamkorlikda olib borilmoqda.
Roskomnadzor RuNetning barqaror ishlashi to’g’risidagi qonun loyihasi bilan unga berilgan yangi vakolatlarni amalga oshirishga tayyor. Bu haqda Davlat Dumasining Axborot siyosati, axborot texnologiyalari va kommunikatsiyalar qo’mitasi yig’ilishida nazorat xizmati rahbari Aleksandr Jarov ma’lum qildi. «Yangi qonun loyihasi bilan bizga berilgan vakolatlar doirasi biz uchun aniq va biz ularni amalga oshirishga tayyormiz», – deya agentlik rahbarining so’zlaridan iqtibos keltiradi TASS. Jarov shuningdek, qonun loyihasini amalga oshirishga tayyorgarlik telekommunikatsiya operatorlari bilan hamkorlikda olib borilayotganini ta’kidladi.
Uning so’zlariga ko’ra, qonunning amalga oshirilishi aloqa sifatiga ta’sir qilmaydi. Qonunga rioya qilish uchun zarur bo’lgan uskunalar sertifikatlanishi kerak, uskunalar sinovdan o’tkazilmoqda va faqat ma’lumotlar uzatish tezligiga ta’sir qilmagan taqdirdagina foydalaniladi, deb ta’kidladi Jarov.
RuNetning avtonom ishlashi to’g’risidagi qonun loyihasi o’tgan yilning dekabr oyida Davlat Dumasiga taqdim etilgan edi. Aprel oyi boshida Davlat Dumasining Axborot siyosati qo’mitasi qonun loyihasiga tuzatishlar tayyorladi, unda RuNetda ma’lumotlar uzatish faqat ichki shifrlash yordamida amalga oshirilishi kerakligi belgilangan. Davlat Dumasining Axborot siyosati, axborot texnologiyalari va kommunikatsiyalar qo’mitasi raisi Leonid Levinning tushuntirishicha, bu talab faqat davlat idoralariga nisbatan qo’llaniladi. Barqaror RuNet to’g’risidagi qonun loyihasi 2019 yil 1 noyabrda kuchga kirishi kutilmoqda.
