Roskomnadzor va telekommunikatsiya operatorlari «avtonom RuNet»ni sinovdan o’tkazadilar
RuNetning suveren faoliyati to’g’risidagi qonun loyihasiga ikkinchi o’qishda tuzatishlar kiritiladi.
Bu hafta Rossiya Davlat Dumasi birinchi o’qishda internetning Rossiya segmenti Butunjahon Internet tarmog’idan uzilgan taqdirda uning suveren ishlashini ta’minlash to’g’risidagi qonun loyihasini qabul qildi. Hujjatda «Rossiya telekommunikatsiya operatorlari xorijiy internet-root serverlariga ulana olmagan taqdirda Rossiya internet-resurslarining ishlashini» ta’minlash uchun infratuzilma yaratish talab qilinadi. Agar qonun loyihasi qabul qilinsa, Roskomnadzor va telekommunikatsiya operatorlari RuNetni tashqi tahdidlardan himoya qilish uchun sinovlar o’tkazishlari shart bo’ladi. Bu haqda Roskomnadzor rahbari Aleksandr Jarov Rossiya investitsiya forumida ma’lum qildi, deb xabar beradi RBC.
«Sinov loyihalari albatta bo’ladi va biz ularni telekommunikatsiya operatorlari bilan birgalikda amalga oshiramiz, lekin faqat qonun qabul qilingandan keyingina», dedi Jarov.
Eslatib o’tamiz, RuNet avtonomiyasi to’g’risidagi qonun loyihasi o’tgan yilning dekabr oyida Rossiya Davlat Dumasiga kiritilgan edi. Uning mualliflari Davlat Dumasi deputati Andrey Lugovoy, Federatsiya Kengashining Konstitutsiyaviy qonunchilik va davlat qurilishi qo’mitasi rahbari Andrey Klishas va uning birinchi o’rinbosari Lyudmila Bokova. Shu oy boshida Vazirlar Mahkamasi hujjatni ma’qulladi va bu bir qator xavotirlarni tug’dirdi. Davlat Dumasi spikeri Vyacheslav Volodin ham qonun loyihasini keyingi o’qish uchun qayta ko’rib chiqish zarurligini e’lon qildi.
Xususan, hujjatga ikkinchi o’qishda telekommunikatsiya operatorlariga davlat maxsus uskunalarni taqdim eta olmasa, ularsiz ishlashga ruxsat beruvchi band qo’shiladi. Qonun loyihasiga ko’ra, telekommunikatsiya operatorlari RuNet global internetdan uzilgan taqdirda trafikni yo’naltirish uchun davlat tomonidan taqdim etilgan uskunalardan foydalanishlari kerak. Biroq, agar hukumat ularni tegishli qurilmalar bilan ta’minlay olmasa, provayderlarga allaqachon mavjud bo’lgan uskunalardan foydalanishga ruxsat beriladi.
