Rossiya elektronika ishlab chiqaruvchilaridan mahalliy dasturiy ta’minotni oldindan o’rnatishni talab qilishi mumkin.
Federal Monopoliyaga qarshi Xizmat mahalliy dasturiy ta’minot ishlab chiqaruvchilari uchun qulay shart-sharoitlarni ta’minlashni rejalashtirmoqda.
Rossiya Federatsiyasining Federal Monopoliyaga Qarshi Xizmati Rossiya bozorida Google, Apple va Microsoftning ustunligiga qarshi kurashish va mahalliy dasturiy ta’minot ishlab chiqaruvchilari uchun qulay sharoitlarni ta’minlash niyatida. FAS ma’lumotlariga ko’ra, rossiyalik foydalanuvchilarning qurilmalarida brauzerlar, tezkor xabar almashish ilovalari, antivirus dasturlari, xaritalar va navigatsiya kabi mahalliy ishlab chiqarilgan dasturiy ta’minot o’rnatilgan bo’lishi kerak. Shuning uchun regulyator elektronika ishlab chiqaruvchilarini o’z mahsulotlariga Rossiya dasturlarini o’rnatishni talab qiluvchi qonun loyihasini tayyorladi. Agar qabul qilinsa, qonun loyihasi og’irligi 10 kg gacha bo’lgan smartfonlar, planshetlar, noutbuklar va ish stoli kompyuterlari ishlab chiqaruvchilariga ta’sir qiladi, deb xabar beradi «Kommersant».
Ishlab chiqaruvchilar foydalanuvchilarga ilovalarni to’liq o’chirish imkoniyatini berishlari shart bo’ladi. Biroq, ularga oldindan o’rnatilgan mahalliy dasturlarni olib tashlashga imkon beruvchi algoritmlarni yaratish taqiqlanadi. Roskomnadzor ushbu talablarga rioya qilinishini nazorat qiladi. Qonun loyihasi Davlat Dumasiga 2019-yil 1-fevralda tasdiqlash uchun taqdim etilishi rejalashtirilgan. Ushbu tashabbus allaqachon Mail.ru Group, Kaspersky Lab, MTS, MegaFon va Russoft tomonidan qo’llab-quvvatlandi.
O’z navbatida, elektronika ishlab chiqaruvchilari taklif qilingan cheklovlarga qo’shilmaydilar. Apple, Samsung, Huawei, Google, Philips va boshqalarni o’z ichiga olgan Savdo kompaniyalari va maishiy elektr va kompyuter uskunalari ishlab chiqaruvchilari assotsiatsiyasi (RATEK) hatto FAS rahbari Igor Artemyevga xat yozdi.
Assotsiatsiya mutaxassislarining fikriga ko’ra, qonun loyihasining qabul qilinishi dasturiy ta’minotning ham, qurilmalarning ham sifati va ishonchliligini pasaytirishi mumkin. Bundan tashqari, RATEK yangi mahsulotlar va dasturiy ta’minotning Rossiya bozoriga kirishi uchun zarur bo’lgan vaqt oshadi va korruptsiya darajasi ham oshadi, deb hisoblaydi.
