Rossiya Huawei kompaniyasiga Android’ni Rossiyaning “Aurora” operatsion tizimiga almashtirishni taklif qildi.
Ayrim Huawei qurilmalarini Rossiyada ishlab chiqarishni mahalliylashtirish bo‘yicha ham muzokaralar olib borilmoqda.
Finlyandiyaning Sailfish platformasiga asoslangan Rossiyaning “Aurora” mobil operatsion tizimi Xitoyning Huawei smartfonlaridagi Android operatsion tizimini almashtirishi mumkin. Bu haqda Huawei bosh direktori Go Ping va raqamli rivojlanish va kommunikatsiyalar vaziri Konstantin Noskov o‘rtasidagi muzokaralardan xabardor manbalarga tayanib, The Bell nashri xabar berdi. Manbalarga ko’ra, muzokaralar ikki yo’nalish bo’yicha olib borilmoqda: Xitoy kompaniyasi AQSh tomonidan taqiqlanganidan keyin foydalanishi cheklangan Google Android o’rniga Huawei smartfonlariga Aurora operatsion tizimini o’rnatish; va Rossiyada Huawei qurilmalarining ayrimlarini ishlab chiqarishni mahalliylashtirish, shuningdek, birgalikda chiplar va dasturiy ta’minot ishlab chiqish mumkin.
Rostelekom matbuot xizmati Huawei’da Aurora’dan foydalanish bo‘yicha hech qanday taklif olmaganini ma’lum qildi, biroq barcha mobil yechim ishlab chiquvchilari bilan ishlashga tayyorligini bildirdi. Xitoy kompaniyasi izoh berishdan bosh tortdi.
Joriy yilning mart oyida Huawei’ning top-menejyeri Android va Windows’ga muqobil sifatida o‘z operatsion tizimini ishlab chiqish haqida e’lon qildi. Ma’lumotlarga ko‘ra, yangi operatsion tizim Xitoyda HongMeng, boshqa mamlakatlarda esa Ark yoki Oak deb nomlanadi. OS joriy yilning kuzida yoki keyingi bahorda chiqarilishi kutilmoqda.
