Rossiya va Xitoy internetni birgalikda tartibga solishga kelishib oldi.
Davlat rahbarlari strategik hamkorlikni rivojlantirish bo‘yicha qo‘shma bayonot berdi.
Rossiya Federatsiyasi va Xitoy Xalq Respublikasi “axborot makonidagi faoliyatni qonunchilik bilan tartibga solish sohasida” almashinuvni kuchaytirish va xalqaro va ichki qonunchilikka muvofiq internet boshqaruvi tamoyillarini birgalikda ilgari surish toʻgʻrisida qaror qabul qildi. Qo‘shma bayonot Rossiya prezidenti Vladimir Putin va Xitoy rahbari Si Tszinpinning 5 iyun kuni Moskvada bo‘lib o‘tgan uchrashuvi yakunlari bo‘yicha e’lon qilindi.Rossiya hukumati rasmiy saytida e’lon qilingan hujjatga ko‘ra, Rossiya va Xitoy barcha davlatlarning teng ishtiroki asosida internetning tinch va xavfsiz ishlashini ta’minlash majburiyatini oladi. Bundan tashqari, har ikki davlat “global axborot makonini tartibli boshqarishni o‘rnatishga ko‘maklashish” niyatida.
Tomonlar, shuningdek, “xalqaro axborot xavfsizligi masalalari boʻyicha aloqalarni kengaytirish, muhim axborot infratuzilmasi xavfsizligi va barqarorligini himoya qilish choralarini kuchaytirish”, “milliy xavfsizlikni taʼminlash bahonasida axborot-kommunikatsiya texnologiyalari mahsulotlari bozoriga kirishni asossiz cheklash, shuningdek, yuqori texnologiyali mahsulotlar eksportini asossiz cheklashlarga qarshi turish”ga kelishib oldilar.
Hujjatda taʼkidlanganidek, Rossiya va Xitoy BMT doirasida davlatlarning axborot makonida masʼuliyatli xatti-harakatlari qoidalarini va “axborot-kommunikatsiya texnologiyalaridan jinoiy maqsadlarda foydalanishga qarshi kurashish boʻyicha universal, qonuniy kuchga ega hujjat”ni oʻrnatish boʻyicha ishlarni davom ettiradi.
