Rossiya Vazirlar Mahkamasi RuNetning avtonom ishlashini ta’minlash rejasini tasdiqladi.
Hukumat o’tgan yilning dekabr oyida Rossiya Federatsiyasi Davlat Dumasiga taqdim etilgan qonun loyihasiga javobini e’lon qildi.
Rossiya Vazirlar Mahkamasi global internet infratuzilmasidan uzilish holatida RuNetning barqaror ishlashini ta’minlash rejasini qo’llab-quvvatladi, ammo bir nechta e’tiroz bildirdi. Eslatib o’tamiz, 2018-yil dekabr oyida senatorlar Andrey Klishas va Lyudmila Bokova hamda deputat Andrey Lugovoy Davlat Dumasiga internetning Rossiya segmentining avtonom ishlashini ta’minlash bo’yicha qonun loyihasini taqdim etishdi. Joriy yilning 1-fevral kuni Vazirlar Mahkamasi taklif qilingan hujjatga javob e’lon qildi va unda bir qator xavotirlar bildirildi.
Vazirlar Mahkamasining ma’lumotlariga ko’ra, qonun loyihasi matnida internet va jamoat aloqa tarmog’ining yaxlitligi, barqarorligi va xavfsizligiga tahdidlar aniq belgilanmagan. Shuningdek, jamoat aloqa tarmog’ini markazlashtirilgan boshqarish qanday hollarda, qanday sharoitlarda va kim tomonidan amalga oshirilishi mumkinligi ham noma’lum.
“Qonun loyihasida tahdidlarga qarshi kurashish uchun aloqa tarmoqlarini texnik vositalar bilan jihozlash taklif qilingan, ammo u ushbu vositalarning ishlashi va modernizatsiyasini, shu jumladan ushbu jarayonlarni moliyaviy qoʻllab-quvvatlash yoki ushbu vositalarning ishlashi natijasida tarmoqdagi nosozliklar natijasida yetkazilgan zararlar, shu jumladan uchinchi shaxslarga yetkazilgan zararlar uchun javobgarlikni tartibga solmaydi”, deyiladi sharhda.
Vazirlar Mahkamasining fikriga ko’ra, qonun loyihasida telekommunikatsiya operatorining ish faoliyatiga putur yetkazmaydigan (masalan, ma’lumotlar uzatish tezligini pasaytirmaydigan) tahdidlarga qarshi kurashishning texnik vositalariga qo’yiladigan talablarni belgilovchi qoida ham bo’lishi kerak.
Bundan tashqari, Vazirlar Mahkamasi qonun loyihasining moliyaviy-iqtisodiy asoslanishida yangi turdagi xarajatlar majburiyatini bajarish manbalari yoki tartiblari ko’rsatilmagan deb hisoblaydi. Qonun loyihasi mualliflarining ta’kidlashicha, qonun loyihasini amalga oshirish xarajatlari allaqachon «Raqamli iqtisodiyot» dasturiga kiritilgan. Bosh vazir o’rinbosari Maksim Akimovning so’zlariga ko’ra, xarajatlarning katta qismi federal byudjet tomonidan qoplanadi va telekommunikatsiya operatorlarining xarajatlari «halokatli» bo’lmaydi. Biroq, mutaxassislarning hisob-kitoblariga ko’ra, xarajatlar 134 milliard rublga yetishi mumkin.
Sharhda, shuningdek, qonun loyihasi Roskomnadzorga vazirlik yoki hukumatning vakolatiga kiradigan tartibga solish funktsiyalarini noqonuniy ravishda bergani ta’kidlangan.
