Rossiyada barcha mobil qurilmalarni pullik ro’yxatdan o’tkazish joriy etilishi mumkin.
Tegishli qonun loyihasi yaqin orada Rossiya Federatsiyasi Davlat Dumasiga ko’rib chiqish uchun taqdim etiladi.
Kelasi yil boshida Rossiyada uyali aloqa tarmoqlarida ishlaydigan barcha qurilmalar uchun pullik ro’yxatdan o’tish joriy etilishi mumkin. RBC xabariga ko’ra, yaqinda Davlat Dumasiga tegishli qonun loyihasi taqdim etiladi. Ushbu tashabbus Federatsiya Kengashi Konstitutsiyaviy qonunchilik qo’mitasi raisining birinchi o’rinbosari Lyudmila Bokova va bir guruh deputatlar tomonidan qo’llab-quvvatlandi. Hujjatda mobil qurilmalarning barcha ishlab chiqaruvchilari va importchilari o’z gadjetlarini IMEI identifikatoridan foydalanib ro’yxatdan o’tkazishlari shart. Chet elda qurilmalarini sotib olgan fuqarolar ularni davlat xizmatlari portalida mustaqil ravishda ro’yxatdan o’tkazishlari mumkin. Ro’yxatdan o’tish uchun 100 rubl miqdorida to’lov olinadi.
Agar qabul qilinsa, qonun nafaqat telefonlarga, balki planshetlar va noutbuklarga ham taalluqli bo’ladi. Bokovaning so’zlariga ko’ra, qonunni seriya raqamlariga ega barcha elektronikaga tatbiq etish imkoniyati ham ko’rib chiqilmoqda. Bunga, xususan, maishiy texnika vositalarida ishlatiladigan turli sensorlar (masalan, gaz hisoblagichlari) kiradi.
Hujjatda Rossvyazning sho»ba korxonasi bo’lgan Aloqa va boshqaruv tizimlari ilmiy-tadqiqot instituti (TsNIIS) tomonidan boshqariladigan yagona markazlashtirilgan IMEI ma’lumotlar bazasini yaratish taklif qilingan. Ushbu ma’lumotlar bazasiga kiritilmagan qurilmalar telekommunikatsiya operatorlari tomonidan bloklanadi. Chet eldan sotib olingan gadjetlar bir necha oy ichida ro’yxatdan o’tkazilishi kerak, aks holda ular bloklanadi. O’g’irlangan qurilmalar ham bloklanishi mumkin.
