Rossiyada kiberjinoyatlar haqida xabar berish uchun resurs yaratiladi.
Platforma prototipi 2020-yil oxiriga qadar taqdim etiladi.
Rossiyada fuqarolar kiberjinoyatlar haqida shikoyat qilishlari mumkin bo’lgan onlayn portal ishga tushiriladi. Tashkilot va uning ishchi guruhi vakillari RBCga ma’lum qilishlaricha, konsepsiya Raqamli iqtisodiyot avtonom notijorat tashkiloti (ANO) tomonidan ma’qullangan. Resurs fuqarolar, yuridik shaxslar va davlat idoralariga kiberhodisalar haqida xabar berish imkonini berishi kutilmoqda va bu ma’lumotlar yagona tizimga kiritiladi. Hodisalar haqida telefon, elektron pochta, tezkor xabar almashish, ijtimoiy tarmoqlar yoki SMS orqali xabar berish mumkin.
Resurs tahdidlar haqidagi ma’lumotlarni uzluksiz va avtomatik ravishda to’playdi, tasniflaydi va ustuvorliklarini belgilaydi. Uning ma’lumotlar bazasi shuningdek, Yagona Biometrik Tizim, Davlat xizmatlari portali, Kredit-moliya sektorida kompyuter hujumlarini monitoring qilish va ularga javob berish markazi (FinCERT) va Kompyuter hujumlarining oqibatlarini aniqlash, oldini olish va bartaraf etish davlat tizimi (GosSOPKA) kabi davlat tizimlari bilan sinxronlashtiriladi.
Ro’yxatdan o’tgan foydalanuvchilar (jismoniy shaxslar, yuridik shaxslar va davlat xizmatchilari) resurs tomonidan to’plangan tahdidlar haqidagi ma’lumotlarga kirish imkoniyatiga ega bo’ladilar. Biroq, ularning platformaga kirish darajasi har xil bo’ladi: agentlik xodimlari uchun vakolatli davlat amaldori, loyiha hamkorlari uchun ishonchli sherik, obunachi va faol fuqaro. Resurs foydalanuvchilari Yagona Biometrik Tizim orqali majburiy identifikatsiyadan o’tishlari shart bo’ladi.
Kiber-hodisalar haqidagi xabarlarni qabul qilish uchun resurs yaratish «Raqamli iqtisodiyot» dasturining «Axborot xavfsizligi» federal loyihasi bo’yicha harakatlar rejasiga kiritilgan. Hukumat konsepsiyani kelasi oyga qadar tasdiqlashi va resursning prototipi 2020 yil oxiriga qadar taqdim etilishi kutilmoqda.
ANO «Raqamli iqtisodiyot» – Rossiya Federatsiyasida raqamli iqtisodiyotni rivojlantirish uchun xizmatlar ko’rsatishga bag’ishlangan avtonom notijorat tashkilot. Tashkilot raqamli iqtisodiyotdagi ijtimoiy ahamiyatga ega loyihalar va tashabbuslarni qo’llab-quvvatlaydi, shuningdek, biznes hamjamiyati, ilmiy va ta’lim tashkilotlari, boshqa hamjamiyatlar va davlat idoralari o’rtasidagi o’zaro aloqalarni muvofiqlashtiradi.
