Rossiyaga aloqador kiberjinoyatchilar guruhi Coincheck kripto birjasini buzishda gumon qilinmoqda.
Ilgari rus tilida so‘zlashuvchi xakerlar hujumlarida ko‘rilgan Mokes va Netwire zararli dasturlari Coincheck kompyuterlarida aniqlangan.
Yaponiyaning Asahi Shimbun gazetasiga ko‘ra, o‘tgan qishda xakerlik hujumiga uchragan yirik kriptovalyuta birjalaridan biri Coincheck xodimlarining shaxsiy kompyuterlari rossiyalik kiberjinoyatchilar guruhi tomonidan boshqariladigan zararli dasturlar bilan zararlangan bo‘lishi mumkin. Buzg‘unchilik 2018-yilning yanvar oyi oxirida sodir bo‘lgan, o‘shanda kriptovalyuta birjasi NEM (XEM) kriptovalyutasida jami 58 milliard iyen (533 million dollar) yo‘qotgan. Avvalroq o‘g‘irlikda Shimoliy Koreya bilan aloqasi bo‘lgan xakerlar ishtirok etgani gumon qilingan edi.
Nashrning yozishicha, Coincheck kompyuterlarida zararli dasturlarning ikki turi — Mokes va Netwire aniqlangan. Birinchisi 2011 yil iyun oyida Rossiya xakerlar forumida paydo bo’lgan bo’lsa, ikkinchisi 12 yil oldin ma’lum bo’lgan. Ikkala dastur ham zararlangan kompyuterni masofadan boshqarish imkonini beradi. Mokes va Netwire avvalroq rus tilida so‘zlashuvchi kiberjinoyatchilar bilan bog‘liq hujumlar bilan bog‘langan. Coincheck holatida infektsiya, ehtimol, zararli elektron pochta xabarlari tufayli yuzaga kelgan.
