uBlock Origin va uMatrix reklama blokerlari endi Chrome uchun mavjud bo’lmasligi mumkin.
Chrome xavfsizlik muammolarini aytib, webRequest API’sini bekor qilishni rejalashtirmoqda.
uBlock Origin va uMatrix kontent blokerlarining yaratuvchisi Raymond Hill, agar brauzer o’zining manifestining uchinchi versiyasini ma’qullasa, Chrome’ni qo’llab-quvvatlashni to’xtatishini e’lon qildi. Manifestda Chrome qo’shimchalariga taqdim etilgan imkoniyatlar va resurslar tasvirlangan. Hujjatning qoralama versiyasida webRequest API’sini blokirovka rejimida ishlashni qo’llab-quvvatlashni to’xtatish taklif qilingan. Shu bilan bir qatorda, tashabbus mualliflari declarativeNetRequest API’sidan foydalanishni taklif qilmoqdalar. Ushbu API cheklanganroq va Hillning so’zlariga ko’ra, to’liq reklama blokirovkasi uchun yetarli emas. Agar Chrome ishlab chiquvchilari webRequest API’sidan voz kechsalar, uBlock Origin va uMatrix reklama blokerlari endi brauzer uchun mavjud bo’lmaydi.
Google webRequest API’sini bekor qilish sababi sifatida foydalanuvchilarni kengaytmalar orqali kontentga nazoratsiz kirishdan himoya qilish istagini keltirdi. Kompaniya foydalanuvchilar kengaytma qanday ma’lumotlarga kirishi mumkinligini o‘zlari aniqlay olishlari kerak, deb hisoblaydi. Biroq, declarativeNetRequest API tarmoq so‘rovlariga to‘g‘ridan-to‘g‘ri kirish imkonini beruvchi kengaytmalarni taqdim etmaydi. API faqat blokirovka qoidalarini o‘rnatishga imkon beradi, lekin ularni o‘zi hal qiladi.
