Venesuelada kiberhujum elektr uzilishining sababi bo’ldi
Venesuela rasmiylari bu hodisani respublikaga qarshi energiya urushi doirasida amalga oshirilgan sabotaj harakati deb hisoblamoqda.
Kuchli kiberhujum Venesuela poytaxti va 20 ta shtatda elektr uzilishlariga sabab bo’ldi. Xususan, Karakasdagi bir nechta metro liniyalari va Mayketiyadagi Simón Bolivar xalqaro aeroporti elektrsiz qoldi. RIA Novosti xabar berishicha, 7-mart, payshanba kuni Bolivar shtatidagi El Guri gidroelektrostansiyasida uzilish yuz berdi. Venesuela prezidenti Nikolas Maduro bu uzilishlarni kiberhujum bilan bog’ladi.
Shanba, 9-mart kuni respublikaning energetika inshootlaridan biriga yana bir kiberhujum uyushtirildi va elektr energiyasini to’liq tiklashga imkon bermadi (hozirda elektr energiyasining atigi 70 foizi tiklandi). Hodisa natijasida Syudad Bolivar shahri yaqinidagi Sidor podstansiyasida yong’in sodir bo’ldi.
9-mart kuni Karakasdagi Chakao munitsipalitetida elektr energiyasi uzilib qoldi, bu yerda bir nechta xorijiy diplomatik vakolatxonalar, hashamatli mehmonxonalar va ko’plab ko’ngilochar maskanlar joylashgan. Mobil telefon va internet xizmati jiddiy ravishda uzilib qolgan.
Milliy elektr energiyasi korporatsiyasi (Corpoelec) ushbu hodisani Venesuelaga qarshi energiya urushi doirasida amalga oshirilgan sabotaj harakati deb biladi. Venesuela aloqa va axborot vaziri Xorxe Rodriges ta’kidlaganidek, AQSh davlat kotibi Mayk Pompeo va senator Marko Rubio ijtimoiy tarmoqlarda voqeaga juda tez munosabat bildirishdi, go’yo ular bu haqda oldindan bilishgandek.
