Windows 10 muammoli yangilanishlarni avtomatik ravishda olib tashlaydi.
Ushbu chora faqat muammoli yangilanishni o’rnatgandan so’ng tizimni tiklashga bo’lgan barcha urinishlar muvaffaqiyatsiz bo’lgan hollarda qo’llaniladi.
Windows 10 yangi dasturiy ta’minotdagi nomuvofiqliklar yoki xatolar tufayli yuklash muammolarini keltirib chiqaradigan yangilanishlarni avtomatik ravishda o’chirib tashlaydi. Yangilangan Microsoft qo’llab-quvvatlash sahifasidagi xabarga ko’ra, ushbu chora faqat muammoli yangilanishni o’rnatgandan so’ng tizimni tiklashga bo’lgan barcha urinishlar muvaffaqiyatsiz tugagan holatlarda qo’llaniladi. Bunday holda, tizim quyidagiga o’xshash xabarni ko’rsatadi: «Yuklash paytida xatolik yuz berganidan so’ng, qurilmangizni tiklash uchun yaqinda o’rnatilgan ba’zi yangilanishlarni olib tashladik.»
Bundan tashqari, Windows muammoli yangilanishlarni o’rnatishni 30 kun davomida avtomatik ravishda bloklaydi, bu vaqt ichida Microsoft muhandislari muammolarni tekshirib, ularni hal qiladi. Ushbu davrdan so’ng, Windows yangilanishlarni yana o’rnatishga harakat qiladi.
Foydalanuvchilar hali ham o’chirilgan yangilanishlarni qayta o’rnatish imkoniyatiga ega bo’ladilar. Biroq, Microsoft ta’kidlashicha, «Agar qurilma ushbu yangilanishlarni avtomatik ravishda yoki qo’lda o’rnatgandan so’ng to’g’ri ishlamasa, Windows ularni yana o’chirib tashlaydi».
