Xitoy kiberjosuslari sakkizta G‘arb IT-kompaniyalari tarmoqlariga kirib borgan.
Hujumchilarning maqsadi kiber josuslik edi.
Xitoy Davlat xavfsizlik vazirligida ishlaydigan xakerlar o‘z mijozlarining tijorat sirlarini o‘g‘irlash maqsadida sakkizta yirik texnologik xizmat ko‘rsatuvchi provayderlar tarmog‘iga kirgan. Yillar davomida davom etgan kiber-josuslik operatsiyasi «Cloud Hopper» deb nomlandi, deya xabar beradi Reuters agentligiga voqealardan xabardor manbalar. O‘tgan dekabr oyida AQSh Adliya vazirligi ikki Xitoy fuqarosini Xitoy iqtisodiyoti manfaati uchun G‘arb kompaniyalaridan intellektual mulk o‘g‘irlaganlikda ayblagan edi. O‘shanda Hewlett Packard Enterprise va IBM kompaniyalari kiber-josuslik amaliyoti qurboni bo‘lgani xabar qilingandi. Endilikda Reuters intellektual mulki Xitoyga o‘tkazib yuborilgan yana oltita tashkilotni aniqladi.
Hewlett Packard Enterprise va IBM’dan tashqari Fujitsu, Tata Consultancy Services, NTT Data, Dimension Data, Computer Sciences Corporation va DXC Technology (Hewlett Packard Enterprise kompaniyasiga tegishli) kiberjosuslik qurboni bo‘ldi. Ushbu kompaniyalarning o’ndan ortiq mijozlari, jumladan, Shvetsiyaning Ericsson telekommunikatsiya kompaniyasi, Amerikaning mudofaa kemasozligi Huntington Ingalls Industries va Sabre sayohatlarni bron qilish xizmati ham jabr ko’rdi.
Reuters yetkazilgan zararning to‘liq hajmini aniqlay olmadi, ko‘plab qurbonlar esa qanday ma’lumotlar o‘g‘irlanganini aniqlay olmadi.
Eslatib o‘tamiz, Xitoy hukumati uchun ishlaydigan xakerlar yuqori martabali amaldorlarga josuslik qilish maqsadida dunyodagi eng yirik o‘nta telekommunikatsiya kompaniyasining tarmoqlariga ham kirib kelgan.
