Xitoylik kiberjosuslar TeamViewer ishlab chiqaruvchisiga hujum qilishdi
Hujumlarda axborot xavfsizligi mutaxassislari Xitoy razvedkasi bilan bog’lagan Winnti zararli dasturi ishlatilgan.
Der Spiegel nashrining yozishicha, masofaviy ish stoliga kirish dasturi TeamViewer ishlab chiqaruvchisi 2016-yilda Xitoy kiberjinoyatchilar guruhi tomonidan nishonga olingan. Hujumlarda xavfsizlik tadqiqotchilari buni Xitoy razvedkasiga bog’laydigan Winnti zararli dasturi ishlatilgan. Kamida 2010-yildan beri faol bo’lgan Winnti guruhi asosan Qo’shma Shtatlar, Yaponiya va Janubiy Koreyada joylashgan dasturiy ta’minot va kompyuter o’yinlari ishlab chiquvchilariga hujumlari bilan mashhur.
Odatda, tajovuzkorlar rasmiy dasturiy ta’minot yoki serverlarni troyan bilan zararlash orqali ta’minot zanjirlarini nishonga olishadi. Tizimga kirgandan so’ng, Winnti troyanlari orqa eshikni yuklab oladi, bu esa tajovuzkorlarga jabrlanuvchining kompyuterini diqqatni jalb qilmasdan masofadan boshqarish imkonini beradi.
Kompaniya vakillari hujumni tasdiqladilar va u «o’z vaqtida» aniqlangani va to’xtatilganini hamda katta miqdordagi zarar yetkazmaganini ta’kidladilar.
«2016-yil kuzida TeamViewer kiberhujumga uchradi. Bizning tizimlarimiz darhol shubhali faoliyatni aniqladi va […] hujumni to’xtatdi […]. Biz mijozlarimizning ma’lumotlari yoki boshqa maxfiy ma’lumotlarining o’g’irlanishi yoki foydalanuvchilarning kompyuterlari virusga chalinganligi yoki TeamViewer manba kodi o’g’irlanganligi, o’zgartirilganligi yoki biron bir tarzda suiiste’mol qilinganligi haqida hech qanday dalil topmadik», deb ta’kidladi kompaniya.
Ishlab chiqaruvchi shuningdek, ushbu kiberhujum 2016-yil may oyidagi voqea bilan hech qanday bog’liq emasligini ta’kidladi, o’shanda ba’zi TeamViewer foydalanuvchilari yordamchi dasturdagi zaiflik tufayli bank hisoblaridagi mablag’larini yo’qotishgan edi.
