Yaponiya rasmiylari fuqarolarning IoT qurilmalarini buzib kirishga ruxsat berdi.
Yaponiya hukumati IoT gadjetlarining xavfsizligini sinovdan o’tkazmoqchi.
Yaponiya hukumati xavfsizlik tadqiqoti doirasida Yaponiya Milliy Axborot va kommunikatsiya texnologiyalari instituti xodimlariga fuqarolarning IoT qurilmalarini buzib kirish huquqini beruvchi qonunga o’zgartirish kiritishni ma’qulladi, deb xabar beradi ZDNet. Nashrning xabar berishicha, kelasi oy boshlanishi rejalashtirilgan tadqiqot Ichki ishlar va kommunikatsiyalar vazirligi nazorati ostida o’tkaziladi. Tadqiqot doirasida institut xodimlariga fuqarolarning IoT qurilmalariga kirish uchun standart parollar va parol lug’atlaridan foydalanishga ruxsat beriladi.
Dastur uy va korporativ 200 milliondan ortiq IoT qurilmalari (routerlar, veb-kameralar va boshqalar) xavfsizligini sinovdan o’tkazishni rejalashtirmoqda.
Tadqiqotning maqsadi standart, oson taxmin qilinadigan parollarga ega himoyalanmagan qurilmalar ro’yxatini yaratishdir. Keyin ushbu ro’yxat tegishli organlar va internet-provayderlar bilan baham ko’rilishi kerak, toki ular zaif qurilmalar egalarini xabardor qilishlari va qurilmalarini himoya qilish choralarini ko’rishlari mumkin.
Dasturning amalga oshirilishi 2020-yilgi Tokiodagi Yozgi Olimpiada o’yinlariga tayyorgarlik va Yaponiya rasmiylarining kiberjinoyatchilar o’yinlarning IT infratuzilmasiga hujum qilish uchun zaif IoT qurilmalaridan foydalanishi mumkinligi haqidagi xavotirlari bilan bog’liq.
Shuni ta’kidlash kerakki, bu xavotirlar asossiz emas. Masalan, o’tgan yilning fevral oyi boshida xakerlar Janubiy Koreyaning Pxyonchxan shahrida bo’lib o’tgan Qishki Olimpiada o’yinlari veb-saytiga Olympic Destroyer zararli dasturidan foydalanib hujum qilishdi. Bir necha oy o’tgach, jinoyatchilar butun dunyo bo’ylab kamida 500 000 ta router va saqlash qurilmalarini yuqori texnologiyali VPNFilter zararli dasturi bilan yuqtirishdi, bu go’yoki Kiyevda bo’lib o’tadigan Chempionlar Ligasi finalidan oldin Ukrainaga keng ko’lamli kiberhujumga tayyorgarlik ko’rish uchun qilingan.
