Yirik alyuminiy ishlab chiqaruvchi Norsk Hydro kiberhujumga uchradi.
Kiberhujum tufayli ba’zi ishlab chiqarish jarayonlari qo’lda ishlash rejimiga o’tkazildi, boshqalari esa to’xtatildi.
Dunyodagi eng yirik alyuminiy ishlab chiqaruvchilardan biri bo’lgan Norsk Hydro kompaniyasi ishlab chiqarish quvvatlarini ishdan chiqargan xakerlik hujumiga uchradi. Reuters agentligining xabar berishicha, hujum 18-mart, dushanba kuni kechqurun boshlanib, bir kechada kuchaygan. Kiberhujum kompaniyaning Norvegiya, Qatar va Braziliya kabi bir qancha mamlakatlardagi faoliyatiga ta’sir ko’rsatdi. Ba’zi ishlab chiqarish jarayonlari qo’lda ishlash rejimiga o’tkazildi, boshqalari esa to’xtatildi.
Kompaniya hozirda hujumni yumshatish choralarini ko’rmoqda, ammo uning aniq ko’lamini aniqlay olmayapti. Xakerlik hujumiga kim aloqador bo’lishi mumkinligi haqida ma’lumot yo’q. Ishlab chiqaruvchi hozirda Norvegiya Milliy xavfsizlik xizmati bilan hamkorlikda hodisani tekshirmoqda.
