20 yoshli Germaniya fuqarosi nemis siyosatchilari va taniqli shaxslarning shaxsiy ma’lumotlarini o’g’irlaganini tan oldi.
Ma’lumotni nashr etishga siyosatchilarning ommaviy bayonotlaridan norozilik sabab bo’lgan.
Germaniya Federal Jinoyat Politsiyasi Boshqarmasi (Bundeskriminalamt, BKA) Gessenning 20 yoshli fuqarosi nemis siyosatchilari, jurnalistlari va jamoat arboblarining shaxsiy ma’lumotlarini o’g’irlash va Twitterda e’lon qilish bilan bog’liq holda hibsga olinganini e’lon qildi. Qizig’i shundaki, ma’lumotlar dekabr oyi davomida e’lon qilingan, ammo ma’lumotlarning sizib chiqishi faqat 2019-yil yanvar oyi boshida sezilgan. Germaniyaning deyarli barcha siyosiy partiyalaridan, o’ng qanot Germaniya uchun alternativa (AfD) bundan mustasno, parlament a’zolarining kredit karta ma’lumotlari, mobil telefon raqamlari, manzillari, fotosuratlari va yozishmalari kabi katta miqdordagi ma’lumotlar ommaga ochiq bo’ldi. Bild nashrining xabar berishicha, ma’lumotlarning sizib chiqishi Xristian Demokratik Ittifoqi (CDU) va Xristian Ijtimoiy Ittifoqi (CSU) ning 405 a’zosiga, Sotsial Demokratik Partiyaning (SPD) 294 a’zosiga, Yashil Partiyaning 105 a’zosiga, Chap partiyaning 82 a’zosiga va Liberal partiyaning 28 a’zosiga ta’sir ko’rsatdi. Kansler Angela Merkel ham jabrlanganlar qatorida qayd etilgan. Keyinchalik hukumat vakili Merkelning maxfiy ma’lumotlari oshkor qilinmaganligini aytdi. OAV xabarlariga ko’ra, qurbonlar orasida nafaqat siyosatchilar, balki aktyor Til Shvayger va teleboshlovchi Yan Böhmermann kabi boshqa jamoat arboblari ham bor.
BKA ma’lumotlariga ko’ra, gumonlanuvchi o’z aybini tan oldi va hibsga olish uchun asos yo’qligi sababli qo’yib yuborildi. Gumonlanuvchi yolg’iz o’zi harakat qilganini da’vo qildi va tergov davomida huquqni muhofaza qilish organlari ma’lumotlarning sizib chiqishiga uchinchi tomonning aloqadorligi haqida hech qanday dalil topmadi. Dastlabki xabarlarga ko’ra, ma’lumotni nashr etishga yuqorida tilga olingan shaxslarning ommaviy bayonotlaridan norozilik sabab bo’lgan.
