445 million Veeam mijozining yozuvlari fosh qilindi

200 Gb ma’lumotlar bazasi ommaviy MongoDB serverida saqlangan.

Virtual infratuzilmani boshqarish va ma’lumotlarni himoya qilish yechimlarini ishlab chiquvchi Veeam Software kompaniyasi 445 million mijoz yozuvlarining sizib chiqishiga uchradi. 200 Gb hajmdagi ma’lumotlar bazasi Amazon infratuzilmasidagi ommaga ochiq bo’lgan MongoDB serverida saqlangan. Ma’lumotlar bazasini topgan xavfsizlik bo’yicha tadqiqotchi Bob Diachenkoning so’zlariga ko’ra, ma’lumotlarda mijozlarning shaxsiy ma’lumotlari, jumladan, ismlar, elektron pochta manzillari va joylashuv ma’lumotlari, shuningdek, mijozlar turi, tashkilot hajmi, IP manzillari, yo’naltiruvchi URL manzillari va foydalanuvchi agentlari haqidagi ma’lumotlar mavjud edi.

Ma’lumotlar bazasi 5-sentabr kuni aniqlangan va kompaniya to’rt kundan keyin serverga kirishni to’xtatgan. Hozircha ma’lumotlar bazasi qancha vaqt davomida ommaga ochiq bo’lib qolgani noma’lum, ammo serverning IP-manzili Shodan qidiruv tizimi tomonidan 31-avgust kuni indekslangan.

Kompaniya vakillarining so’zlariga ko’ra, ma’lumotlar bazasi marketing ma’lumotlar bazalarining bir qismi bo’lgan va hech qanday maxfiy ma’lumotlarni o’z ichiga olmagan. Barcha Veeam ma’lumotlar bazalari endi tegishli ravishda himoyalangan.

Veeam Software kompaniyasining taxminan 307 000 mijozdan iborat mijozlar bazasiga Norwegian Cruise Line, Gatwick aeroporti, universitetlar va sog’liqni saqlash muassasalari hamda yetakchi avtobus va yuk mashinalari ishlab chiqaruvchi Scania kiradi.