50 000 dan ortiq foydalanuvchi zararli Android batareya tejovchi ilovasini yuklab oldi.

Dastur qurilma haqidagi maʼlumotlarni, jumladan, telefon raqami, IMEI, shuningdek, model, ishlab chiqaruvchi, joylashuv va boshqa tafsilotlarni o‘g‘irlaydi

RiskIQ kompaniyasi xavfsizlik bo‘yicha tadqiqotchilari Android foydalanuvchilariga qaratilgan zararli kampaniyani aniqladilar. Google Play do‘konida joylashtirilgan va maʼlumotlarni o‘g‘irlashga mo‘ljallangan ushbu dastur batareya quvvatini tejovchi ilova sifatida niqoblangan. «Advanced Battery Saver» deb nomlangan ushbu Android ilovasi o‘rnatilgach, haqiqatan ham quvvat sarfini kamaytiradi, batareya ishlash muddatini uzaytiradi va keraksiz uchinchi tomon ilovalarini yopadi. ​​Biroq, tadqiqotchilarning taʼkidlashicha, ilova shuningdek, maxfiy jurnal (log) maʼlumotlariga kirish, SMS-xabarlarni o‘qish va tarmoqqa to‘liq kirish huquqlarini ham qo‘lga kiritadi.

Bundan tashqari, dastur fond rejimida reklamalarni namoyish etib, foydalanuvchilarni reklama va havolalarni bosishga undaydi hamda qurilma haqidagi maʼlumotlarni, jumladan, telefon raqami, IMEI, shuningdek, model, ishlab chiqaruvchi, joylashuv va boshqa maʼlumotlarni yig‘adi.

Bugungi kunga qadar zararli «Advanced Battery Saver» ilovasi butun dunyo bo‘ylab 50 000 dan ortiq foydalanuvchi tomonidan yuklab olingan.

Tadqiqotchilar ilovaning qo‘shimcha ma’lumotlar bo‘limida topilgan elektron pochta manzili asosida zararli dastur muallifini aniqlashga urinib ko‘rishdi va o‘sha dasturchi Play Store’ga kriptovalyutaga oid yana bir ilova yuklaganini aniqlashdi; biroq ushbu xabar e’lon qilingan paytga kelib, mazkur ilova allaqachon olib tashlangan edi.