Alcatel smartfonlarida oldindan o’rnatilgan zararli dastur topildi
Zararli kod Google Play do’konida joylashtirilgan Weather ilovasining rasmiy versiyasi – Simple Weatherda ham mavjud edi.
Britaniyaning Upstream kompaniyasi mutaxassislari ba’zi mijozlarning smartfonlaridan shubhali trafik kelayotganini payqashdi. Tekshiruv shuni ko’rsatdiki, muammo Alcatel, BlackBerry va Palm brendlariga egalik qiluvchi Xitoyning TCL Corporation kompaniyasi tomonidan ishlab chiqilgan «Weather Forecast-World Weather Accurate Radar» deb nomlangan ob-havo ma’lumoti ilovasida mavjud. Ilova bir nechta Alcatel smartfon modellarida (xususan, Pixi 4 va A3 Max) oldindan o’rnatilgan va Google Play Store orqali boshqa Android foydalanuvchilari uchun ham mavjud edi (u 10 milliondan ortiq marta yuklab olingan).
Dastlab, mutaxassislar ilova ma’lumotlarni (joylashuv ma’lumotlari, elektron pochta manzillari, IMEI) to’playotganini va uni Xitoydagi serverlarga yuborayotganini aniqladilar. Keyinchalik, ilova ichida yashiringan zararli dastur ayrim mintaqalarda boshqacha ish tutgani aniqlandi. Masalan, Braziliya, Quvayt, Nigeriya, Janubiy Afrika, Misr va Tunisda ilova foydalanuvchilarni qimmat pullik xizmatlarga obuna bo’lishga uringan. Mutaxassislar jami 27 milliondan ortiq pullik xizmatlarga obuna bo’lish urinishlarini blokladilar, bu esa 1,5 million dollar zararga olib kelishi mumkin edi.
Ilovaning zararli xatti-harakatlari faqat ma’lumotlarni to’plash va pullik xizmatlarga obuna bo’lish bilan cheklanib qolmadi — u reklama dasturi sifatida ham ishladi. U orqa fonda yashirin brauzer yorliqlarini ochdi va veb-sahifalarni yukladi, u yerda banner reklamalarini bosdi. Ilovaning faoliyati har kuni 50 MB dan 250 MB gacha trafik hosil qildi va qo’shimcha moliyaviy zarar keltirdi.
Google ilovani allaqachon Play Store’dan olib tashlagan. Ilovaning oldindan o‘rnatilgan va Play Store versiyalari qanday qilib zararli dasturlar bilan zararlangani noma’lum. Bir nazariyaga ko‘ra, infeksiya manbai TCL Corporation’ning tizimlari buzilgan dasturchisi bo‘lishi mumkin. Kompaniya hozircha vaziyat bo‘yicha izoh bermadi.
