Apple, Google, Microsoft va Mozilla kompaniyalari TLS 1.0 va 1.1 versiyalarini qo’llab-quvvatlashni to’xtatishlarini e’lon qilishdi.

Ishlab chiqaruvchilar TLS protokolining eski versiyalarini to’xtatishga chaqirishdi.

2020-yilning birinchi yarmida barcha yirik brauzerlar (Safari, Chrome, Edge, Internet Explorer va Firefox) sukut bo’yicha TLS 1.0 va 1.1 ni qo’llab-quvvatlashni to’xtatadi. Ushbu rejalar brauzer ishlab chiqaruvchilari, Apple, Google, Microsoft va Mozilla tomonidan e’lon qilindi. «Keyingi yilning 19-yanvarida veb orqali xavfsiz ulanishlarni shifrlaydigan va autentifikatsiya qiladigan protokolning birinchi versiyasi bo’lgan TLS 1.0 ning 20 yilligi nishonlanadi […] Xavfsizlik texnologiyalari o’zgarishsiz qolishi uchun yigirma yil uzoq vaqt. Hozirgi TLS 1.0 va TLS 1.1 implementatsiyalarimizdagi biron bir zaiflikdan xabardor bo’lmasak-da, uchinchi tomon implementatsiyalaridagi zaifliklar mavjud. Yangi versiyalarga o’tish hamma uchun xavfsizroq internetni ta’minlashga yordam beradi», deb ta’kidladi Microsoft blog postida.

TLS 1.0 va 1.1 zaif MD5 va SHA-1 algoritmlariga tayanadi. Ushbu versiyalar barcha HTTPS ulanishlarining atigi 0,5% ni tashkil qiladi.

Google Chrome 72 versiyasi chiqarilishi bilan TLS 1.0 va 1.1 ni o’chirib qo’yishni boshlash niyatida, to’liq qo’llab-quvvatlash 2020-yil boshida Chrome 81 versiyasi chiqarilishi bilan tugaydi. Edge va Internet Explorer 11 2020-yilning birinchi yarmida eski protokolni qo’llab-quvvatlashni to’xtatadi, Firefox va Safari esa o’sha yilning mart oyida shunga o’xshash ishlarni amalga oshiradi.

Yuqoridagi barcha brauzerlar TLS 1.2 ni qo’llab-quvvatlaydi, Chrome va Firefox esa allaqachon TLS 1.3 ni qo’llab-quvvatlaydi. Apple va Microsoft hozirda ushbu versiyani o’z brauzerlarida joriy etish ustida ishlamoqda.

Transport Layer Security (TLS), Secure Sockets Layer (SSL) protokoli asosida ishlab chiqilgan bo’lib, mijozlar va serverlar o’rtasida xavfsiz va shifrlangan aloqa kanalini o’rnatish uchun ishlatiladigan yangilangan kriptografik protokoldir.