Apple iPhone’larni razvedka idoralari tomonidan buzib kirishdan himoya qiladi.

Ushbu chora politsiya asosli sababsiz telefonlarni musodara qilishi mumkin bo‘lgan mamlakatlardagi mijozlarni himoya qilishga qaratilgan.

Apple huquqni muhofaza qiluvchi organlar tomonidan qurilmalardagi ma’lumotlarga kirish uchun qo‘llaniladigan vositalardan himoyalanish maqsadida iPhone sozlamalariga o‘zgartirish kiritish rejalarini e’lon qildi. Kompaniya vakillarining Reuters agentligiga ma’lum qilishicha, ushbu qadam politsiya asosli sababsiz telefonlarni musodara qilishi mumkin bo‘lgan mamlakatlardagi mijozlar xavfsizligini ta’minlashni ko‘zlaydi. Shuningdek, Apple ushbu xakerlik usullari g‘arazli niyatli shaxslar qo‘liga tushib qolishi va foydalanuvchilarni kuzatish uchun ishlatilishi mumkinligidan xavotirda.

Xususan, Apple iPhone operatsion tizimining standart sozlamalarini o‘zgartirishni rejalashtirmoqda: agar telefon oxirgi bir soat ichida qulfdan chiqarilmagan bo‘lsa, USB orqali ulanish imkoniyati o‘chirib qo‘yiladi. Ushbu portdan GrayShift va Cellebrite kabi kompaniyalar tomonidan ishlab chiqilgan vositalar qurilmaga ulanish hamda parol kiritish urinishlari sonini cheklovchi xavfsizlik mexanizmlarini chetlab o‘tish uchun foydalaniladi.

Eslatib o‘tamiz, sud-ekspertiza vositalarini ishlab chiqaruvchi Isroil kompaniyasi — Cellebrite avvalroq o‘z mijozlariga iOS 11 operatsion tizimida ishlaydigan har qanday qurilmani buzib kirish imkoniyati paydo bo‘lgani haqida xabar bergan edi. Bundan tashqari, AQSh razvedka xizmatlari pudratchilari va Apple kompaniyasining sobiq muhandisi tomonidan asos solingani aytilayotgan Grayshift startapi ma’lum doiralarda iPhone’larni qulfdan chiqarishga mo‘ljallangan GrayKey nomli vosita haqidagi marketing materiallarini tarqata boshladi.