AQSh ma’lumotlar sizib chiqishini yashirgan kompaniya rahbarlari uchun 20 yillik qamoq jazosini joriy qilishi mumkin.

Oregon shtatidan senator «Iste’molchilar ma’lumotlarini himoya qilish to’g’risida»gi qonun loyihasi ustida ishlamoqda.

Oregon shtatidan AQSh senatori Ron Vayden Yevropa umumiy ma’lumotlarni himoya qilish reglamentiga (GDPR) o’xshash iste’molchilar ma’lumotlarini himoya qilish to’g’risidagi qonun loyihasi ustida ishlamoqda. Bundan tashqari, GDPRdan farqli o’laroq, qonun loyihasi yirik kompaniyalar rahbarlarini iste’molchilar ma’lumotlarining oshkor bo’lishi haqida noto’g’ri ma’lumot berganlik yoki taqdim etganlik uchun qamoq jazosi bilan jazolaydi. Iste’molchilar ma’lumotlarini himoya qilish to’g’risidagi qonun (CDPA) deb nomlangan loyiha hozirda ishlab chiqish bosqichida, ammo Vayden allaqachon jamoatchilik muhokamasi uchun qoralama versiyasini nashr etgan.

Hujjatda maxfiylikni himoya qilish va kiberxavfsizlik uchun majburiy minimal talablar belgilangan. Ushbu talablarga rioya qilmaslik yillik daromadning 4% gacha jarimaga sabab bo’ladi.

CDPA shuningdek, kompaniyalardan AQSh Federal Savdo Komissiyasiga yillik ma’lumotlar xavfsizligi hisobotini taqdim etishni talab qiladi. Ushbu talab 50 milliondan ortiq foydalanuvchilarning ma’lumotlarini qayta ishlaydigan yoki yillik daromadi 1 milliard dollardan oshadigan kompaniyalarga nisbatan qo’llaniladi. Hisobotlar uchun javobgarlik kompaniyaning bosh direktori, ma’lumotlar maxfiyligi bo’yicha bosh xodimi yoki axborot xavfsizligi bo’yicha bosh xodimi zimmasida bo’ladi.

Hisobotlarda kompaniyaning CDPAga rioya qilgan-qilmagani va qanday rioya qilgani oshkor qilinishi kerak. Direktorlar ma’lumotlarning oqishini yashirganliklari yoki yolg’on ma’lumotlar berganliklari uchun 20 yilgacha qamoq jazosiga hukm qilinishi mumkin.

Hujjatda Federal Savdo Komissiyasiga foydalanuvchilarga shaxsiy ma’lumotlarini kompaniyalar bilan baham ko’rishdan bosh tortish imkonini beruvchi «Kuzatmaslik» tizimini ishlab chiqish va joriy etish taklif qilingan.

CDPA kompaniyalarga shaxsiy ma’lumotlarini oshkor qilmaslikni tanlagan foydalanuvchilarga xizmatlarni rad etishni taqiqlaydi. Agar foydalanuvchi o’z ma’lumotlarini taqdim etishdan bosh tortsa, kompaniyalar ulardan to’lov undirish huquqiga ega bo’ladi.

Qonun loyihasiga ko’ra, foydalanuvchilar kompaniya ular haqida qanday shaxsiy ma’lumotlarni to’plashini va ular kim bilan baham ko’rilishini bilish huquqiga ega bo’ladilar.

Agar qonun qabul qilinsa, Federal Savdo Komissiyasida foydalanuvchi ma’lumotlari maxfiyligini nazorat qilish uchun 175 dan ortiq yangi ish o’rinlari yaratiladi.