AQSh Rossiya, Xitoy va Eronni iqtisodiy kiberjosuslikda aybladi.

Yangi hisobotga ko’ra, ruslar, xitoyliklar va eronliklar Amerika kompaniyalarining intellektual mulkini nishonga olmoqda.

Payshanba, 26-iyul kuni AQSh Milliy Kontrrazvedka va Xavfsizlik Markazi xorijiy davlatlar tomonidan Amerika tashkilotlaridan intellektual mulk, tijorat sirlari va boshqa mulkiy ma’lumotlarni o’g’irlashga qaratilgan kiberjosuslik kampaniyalari haqida hisobot e’lon qildi. Hisobotga ko’ra, AQSh uchun asosiy kibertahdidlar Xitoy, Eron va Rossiya hisoblanadi. Bu davlatlar texnologiya kompaniyalari, ishlab chiqarish korxonalari va mudofaa pudratchilari tarmoqlariga qaratilgan murakkab, keng ko’lamli operatsiyalarni amalga oshiradilar. Hujjatda shuningdek, 2017-yilda «rus xakerlari» o’nlab AQSh energetika kompaniyalarini, jumladan, ularning operatsion tarmoqlarini buzib kirganliklari haqida xabar berilgan.

“Biz Xitoy, Rossiya va Eron AQShning nozik iqtisodiy maʼlumotlari va texnologiyalarini, ayniqsa kibermakonda, agressiv va mohirona toʻplashda davom etishiga aminmiz. Ular intellektual mulk va mulkiy maʼlumotlarni olish uchun ulkan resurslar va keng koʻlamli taktikalardan foydalanishda davom etishlari mumkin”, deyiladi hisobotda.

Federatsiya Kengashi Iqtisodiy qo’mitasi raisining birinchi o’rinbosari Sergey Kalashnikov RIA Novosti agentligiga bergan intervyusida AQSh Rossiyani gibrid urushning bir qismi sifatida ataylab iqtisodiy josuslikda ayblaganini aytdi. Bunday da’volar haqiqatga to’g’ri kelmaydi va «soxta ma’lumot» ni tashkil qiladi. Kalashnikovning so’zlariga ko’ra, zamonaviy texnologiyalarni «internetdan olish» mumkin emas.