AQSh «rossiyalik xakerlar»dan xavotirda.

Amerika muxlislariga 2018-yilgi Jahon chempionatiga telefon va noutbuk olib bormaslik tavsiya qilindi.

AQSh Milliy kontrazvedka markazi rahbari Uilyam Evanina Jahon chempionati uchun Rossiyaga borishni rejalashtirayotgan amerikalik muxlislarni o‘zlari bilan smartfon, noutbuk yoki boshqa elektron qurilmalar olib bormaslik haqida ogohlantirdi.

Evaninaning fikricha, Rossiya hukumati yoki kiberjinoyatchilar ushbu qurilmalarni buzib kirishga urinish ehtimoli yuqori. Uning so‘zlariga ko‘ra, eng katta xavf davlat amaldorlari va korporatsiya vakillariga tahdid soladi, biroq oddiy amerikaliklar ham xakerlar qurboniga aylanishi mumkin. Gadjetlarsiz ishini yurita olmaydigan foydalanuvchilarga Evanina shaxsiy qurilmalar o‘rniga shaxsiy yoki boshqa maxfiy ma’lumotlar saqlanmagan «vaqtinchalik» smartfonlardan foydalanishni hamda qurilma ishlatilmayotgan paytda uning batareyasini chiqarib qo‘yishni tavsiya qildi.

Reuters agentligi xabariga ko‘ra, Britaniya razvedka xizmatlari Buyuk Britaniya fuqarolari va Angliya futbol klublariga shunga o‘xshash ogohlantirishlar bergan.

Eslatib o‘tamiz, futbol bo‘yicha jahon chempionati 2018-yilning 14-iyunidan 15-iyuliga qadar Rossiyada bo‘lib o‘tadi.