AQSh Rossiyaning mamlakat elektr tarmog’iga qilingan hujumlarga aloqadorligidan shubhalanmoqda.
Hujumchilar AQShning 24 shtatida yuzlab pudratchilarni nishonga olishdi.
AQSh Ichki xavfsizlik departamenti rossiyalik kiberjinoyatchilarni 2016-2017 yillarda mamlakat elektr tarmog’iga keng ko’lamli kiberhujumlarni rejalashtirganlikda gumon qilmoqda. The Wall Street Journal nashrining yozishicha, hujumchilar AQShning 24 shtatida, shuningdek, Kanada va Buyuk Britaniyada yuzlab pudratchilarni nishonga olishgan. Nashr o’z tekshiruvini o’tkazdi, zarar ko’rgan kompaniyalar xodimlari, sobiq va amaldagi AQSh amaldorlari bilan suhbatlashdi hamda hujjatlar va kompyuter ma’lumotlari arxivlarini ko’rib chiqdi.
Jabrlangan kompaniyalar qatoriga All-Ways Excavating USA, Carlson Testing and Commercial Contractors, davlatga qarashli Bonneville Power and PacifiCorp va Berkshire Hathaway kiradi. Ushbu firmalarning ba’zilari hujumlar haqida huquqni muhofaza qilish organlari tomonidan xabardor qilingan, boshqalari bu buzg’unchilik haqida kiberxavfsizlik bo’yicha mutaxassislardan, ba’zilari esa faqat WSJ jurnalistlaridan bilib olishgan.
DHS kiberxavfsizlik bo’limi boshlig’i Janet Manfraning so’zlariga ko’ra, kiberhujumlarning dastlabki belgilari 2016-yil o’rtalarida sezilgan va o’ziga xos vositalar va taktikalardan foydalanish rossiyalik kiberjinoyatchilarning ishtirokini ko’rsatadi. Xususan, bitta holatda Turkiya, Fransiya va Niderlandiyada ro’yxatdan o’tgan IP-manzillar ishlatilgan.
Rossiya rasmiylari xakerlik hujumlariga aloqadorlik haqidagi ayblovlarni bir necha bor rad etgan. Rossiya prezidenti Vladimir Putin Xelsinkida AQSh prezidenti Donald Tramp bilan uchrashuvidan keyingi matbuot anjumanida ta’kidlaganidek, Rossiya qo’shma kiberxavfsizlik guruhi doirasida hamkorlik qilishga tayyor.
