AQSh senatori «rossiyalik xakerlar»ni o’zining saylovoldi shtab-kvartirasiga kiberhujum uyushtirishda aybladi.

Hodisa Fancy Bear xakerlar guruhining ishi deb taxmin qilinmoqda.

Missuri shtati senatori Kler Makkaskill rossiyalik xakerlar uning saylovoldi kampaniyasining kompyuter tarmoqlariga kiberhujum uyushtirishga uringanliklarini xabar qildi, deb xabar beradi The Daily Beast. Makkaskillning aytishicha, urinish muvaffaqiyatsiz tugagan.

“Rossiya bizning demokratiyamizga qarshi kiberurush olib borishda davom etmoqda. Men qatʼiy gapirishda davom etaman va ularning javobgarlikka tortilishini talab qilaman. Bu hujum muvaffaqiyatsiz boʻlgan boʻlsa-da, ularning bunday narsani amalga oshirishlari mumkin deb oʻylashlari gʻayritabiiydir. Men qoʻrqmayman”, dedi u.

Kiberhujum fishing elektron pochtalaridan iborat edi. Hodisa Fancy Bear xakerlar guruhining ishi deb taxmin qilinmoqda. Makkaskill hujum qachon sodir bo’lganini aniq aytmadi, ammo The Daily Beast nashri uning 2017-yil avgust oyida sodir bo’lganiga ishonadi.

Senatning Ichki xavfsizlik va hukumat ishlari qo’mitasi a’zosi, demokrat Kler Makkaskill Rossiyaga qarshi pozitsiyasi va Rossiya hukumati haqidagi keskin bayonotlari bilan tanilgan. Hozirda u 2018-yil noyabr oyida bo’lib o’tadigan oraliq saylovlarda Senatga qayta saylanish uchun kampaniya olib bormoqda.

Eslatib o’tamiz, Microsoft ilgari AQSh Kongressiga nomzodlarning kamida uchtasining kompyuterlariga qaratilgan xakerlik hujumlarini aniqlagan va oldini olgan edi.