AQShdagi foydalanuvchilar internetsiz qolishdi.
CenturyLink telekommunikatsiya kompaniyasining abonentlari internetdan uzib qo’yildi.
Payshanba, 27-dekabr kuni Qo’shma Shtatlar bo’ylab foydalanuvchilar internet xizmatisiz qolishdi. Associated Press agentligining xabar berishicha, muammo CenturyLink abonentlari va Verizonning ba’zi mijozlariga ta’sir ko’rsatdi. Uzilish payshanba kuni kechqurun boshlandi. Kompaniyaning Twitterdagi postiga ko’ra, uning muhandislari muammoli «tarmoq elementi»ni aniqladilar va internet xizmati yaqin bir necha soat ichida tiklanadi.
Jabrlanganlarning aniq soni noma’lum, ammo Nyu-Yorkdan Kaliforniyagacha bo’lgan foydalanuvchilar internetga ulanish bilan bog’liq muammolar haqida xabar berishmoqda. Federal aloqa komissiyasi komissari Jessika Rozenvorselning so’zlariga ko’ra, voqea butun mamlakatga ta’sir ko’rsatdi va tergovni talab qiladi.
Internet aloqasi yo’qligi sababli, Vashingtonning g’arbiy qismidagi favqulodda xizmatlar telefon qo’ng’iroqlarini qabul qila olmadi. CenturyLink abonentlari 911 raqamiga qo’ng’iroq qilishga urinayotganda faqat qisqa signallarni qabul qilishdi. Missuri, Aydaho va Arizona shtatlarining ayrim hududlarida yashovchilar ham favqulodda xizmatlarga murojaat qila olmaganliklarini xabar qilishdi.
Internetdagi muammolar Aydaho tuzatish departamenti va Aydaho shtati ta’lim departamentida telefon liniyalarini vaqtincha uzib qo’ydi. Aydaho va Montanada ba’zi bankomatlar ishlamay qoldi. Kolorado shtatining Grili shahridagi tibbiyot markazi xodimlari bemorlarning elektron tibbiy kartalariga kirishda qiyinchiliklarga duch kelishdi, natijada ular barcha yozuvlarni qo’lda kiritishga majbur bo’lishdi. Vayomingda yutgan lotereya raqamlarini e’lon qilish bir kunga kechiktirildi.
Albukerke, Nyu-Meksiko va Montana shtatining ayrim qismlaridagi Verizon abonentlari ham internetga ulanishda muammolarga duch kelishdi, chunki kompaniya ushbu hududlarda trafikni uzatish uchun CenturyLink va boshqa provayderlarning tarmoqlariga tayanadi.
